DÍLI----Ministru Prezidenti Konsellu Ministru (MPKM) Fidelis Leite Magalhães hatete, Governu aprova impozisaun Serka Sanitária ba munispiu tolu kompostu husi Munisípiu Lautém, Likisa no Manufahi, ne'ebe hahú loron 30 fulan Abril no seí termina iha loron 16 fulan Maiu tinan ne'e.

“Aprova mós impozisaun serka sanitária iha munisípiu Lautém, Likisá, Manufahi, entre tuku 00:00 iha loron 30 fulan-abril tinan 2021 no termina iha tuku 23:59 loron 16 fulan-Maiu tinan 2021,” Dehan Ministru Prezidenti Konsellu Ministru (MPKM) Fidelis Leite Magalhães hafoin remata enkontru ho Konsellu Ministru ba Jornalista sira iha Palásiu Governu, Kinta (19/04).

Governante ne'e fundamenta, Governu komtinua bandu sirkulasaun movimentu transporte públiku ba Munisípiu mai Kapitál Díli no Kapitál Díli ba Munisípiu sira seluk. "Nune’e, Governu bandu sirkulasaun ema nian entre munisípiu ne’e ho sirkunskrisaun administrativa sira-seluk, exetu iha kazu sira ho fundamentu forte tanba razaun seguransa públika, saúde públika, asisténsia umanitária, manutensaun husi sistema abastesimentu públiku, ka razaun seluk ne’ebé presiza atu hala’o ba interese públiku nian," Hateten Fidelis

Alende ne'e mós Konsellu Ministru aprova ho alterasaun projetu Rezolusaun Governu nian ba impozisaun konfinamentu domisiliáriu jerál ba ema hotu, ne’ebé mak oras ne’e daudaun iha hela Munisípiu Dili, ne’ebé tenke hela iha sira nia uma, no sira nia alojamentu temporáriu, tuku 00:00 loron 30 fulan Abril tinan 2021 no tuku 23:59 loron 13 fulan-Maiu tinan 2021. Tuir nia, exesionalmente ema sira bele saí husi iha sira nia hela fátin no husi sira nia alojamentu temporáriu iha Munisípiu Dili, bainhira ba hospitál atu konsulta médiku hodi hetan ai-moruk.

Entretantu akompaña membru família no ema ne’ebé mak tau matan hodi hetan asisténsia iha hospitál, médiku no atu hetan ai-moruk, atu fó asisténsia ba ema seluk ne’ebé presiza ho razaun saúde nian, protesaun sosiál asisténsia umanitária. Atu aprezenta keixa ba denúnsia iha Ministériu Públiku, iha Provedória Direitus Umanus no Justisa nian, iha kualkér órgaun polísia kriminál, atu komparese iha dilijénsia judisiál no polisiá sira ne’ebé simu notifikasaun, atu sosa ai-han, refeisaun, sasán ba primeira nesesidade no kombustivel, atu selu servisu eletrisidade, telekomunikasaun, asesu ba internet nian, atu hetan asesu ba servisu finanseiru, atu halo atividade profisionál, bainhira superiór ierárkiku la fó dispensa.

Enkuantu, iha kazu funsionáriu, ajente no traballadór administrasaun públika nian, no bainhira entidade empregadora rasik la fó dispensa, iha kazu traballadór iha setór privadu ekonómia nian, atu partisipa iha funerál sira, tuir regra ne’ebé prevee iha Rezolusaun Governu nian, atu rekere autorizasaun atu saí husi munisípiu Dili ba Munisípiu seluk. Dezlokasaun hirak ne’e bele hala’o de’it durante tempu ne’ebé presiza tebes, atu konkretiza objetivu dezlokasaun ne’e nian, no bainhira akontese, tanbá razaun serbisu, ema tenke lori dokumentu ne’ebé hatudu sira nia obrigasaun atu ba iha servisu fatin. (BT)