DILI----Prezidente Repúblika fó Posse ba Dr. Alfonso Lopez Nu’udar Prokuradór Jerál Repúblika hafoin ezonera husi kargu Adjuntu Prokuradór Jerál Repúblika tanba bazeia ba Dekretu Prezidente Repúblika númeru 22/2021, 28 abril, hafoin rona Governu, tuir artigu 86, alínea k) husi artigu 133, númeru 3, Konstituisaun Repúblika, konjuga ho artigu 12, númeru 1, númeru 2 husi Lei númeru 14/2005, 16 setembru, altera husi Lei númeru 11/2011, 28 setembru (Estatutu Ministériu Públiku) dekreta hodi nomea Alfonso Lopez nu’udar Prokuradór Jerál Repúblika.

“Ohin ita testemuña Prezidente Repúblika fó posse ba dirijente as liu iha estrutura Ministériu Públiku nian. Tuir Estatutu Ministériu Públiku nian, posse ne’ e atu obrigatóriu ida ne’ebé marka loron dahuluk emposadu hahú nia knaar. Haree ba alínea k) artigu 86° no n° 3 artigu 133° husi Konstituisaun RDTL , no mós ba artigu 12°, n°1 no n°2 husi Lei n°14 /2005, ho data 16 setembru, altera ho Lei n°11/2011 ho data 28 setembru, kona-ba ba Estatutu Ministériu Públiku, kompete ba Prezidente Repúblika nomeia Prokurador-Jeral Repúblika, hafoin rona Governu.

Prezidente Repúblika rona uluk Governu molok nomeia Dr. Alfonso Lopez nu’ udar Prokurador-Jeral Repúblika foun. Governu la haree buat ruma hasoru nomeasaun ne’e. Nune’e, Dr Alfonso Lopez, enposadu ohin, hahú ninia mandatu husi ohin ba oin, nu’ udar Prokurador-Jeral Repúblika ba tinan haat” Hatete Prezidente Repúblika, Francisco Guterres Lú Olo liuhusi diskursu iha Palasiu Presidente Aitarak-Lara Dili, Kinta (29/04)

Presidente hatutan, Haktuir n°6 artigu 133° Konstituisaun RDTL, hafoin rona Konsellu Superior Ministériu Públiku, Prezidente Repúblika ezonera Dr. Alfonsu husi nia kargu nu’ udar Prokurador-Jeral Adjuntu. Kargu ida ne ‘e sei husik mamuk lae. Iha tempu badak tuir mai mak sei nomeia adjuntus ba Prokurador-Jeral Repúblika, tuir prosedimentu legal en-vigor.

Tuir n°1 artigu 132° Konstituisaun RDTL, kompete ba Ministériu Públiku reprezenta Estadu, ezerse asaun penal, asegura defeza ba menor sira, auzente no inkapaz sira, defende legalidade demokrátika no promove kumprimentu lei nian. Atu bele hala’o kompeténsia sira ne’e hotu, Majistratura ida ne’e tenke iha rekursus umanus ho kapasidade téknika no idoneidade moral atu hasoru dezafiu sira ne’ebé mosu loron-loron iha ita-nia mundu ohin-loron nian. Rekursus umanus mak organizasaun nia rikusoin boot liu!

Nia dehan, Dalan importante tebes ida atu organizasaun hetan ninia objetivu mak harii ekipas traballu ho ema ne’ebé teknikamente di’ak no iha moral as tanba hametin fiar husi ema. Atu hetan susesu, servisu nu’ udar ekipa importante maibé la’ós tanba iha ekipa mak iha susesu. Importante iha dirijente sira ne’ebé hatene orienta, koordena, fó instrusaun, kontrola atividade sira ne’ebé membru sira husi ekipa traballu halo hela no ezije prestasaun kontas.

Ho ida ne’e, La natoon iha de’ it kapasidade téknika, idoneidade moral, hala’ o knaar nu’udar ekipa no iha dirijente atu orienta, koordena no fó instrusaun. Bainhira hala’ o knaar, importante iha mós aten-barani, atu hetan susesu. Luta hasoru kriminalidade ezije iha aten-barani. Autoridade Estadu nian kona-ba kestaun sira ne’ebé pertense ba Ministériu Públiku tenke hala’o ho aten-barani. Se la iha aten-barani, sira ne’ebé sai alegadu kriminozu sei la hatán ba sira-nia hahalok sala no kriminozu potensial sira seluk sei mosu babeibeik.

Nune’e, haree ba buat hotu ne’ebé majistratura konsege hetan ona, ha’ u hakarak hato’o ha’u-nia saudasaun espesiál ba Dr. José da Costa Ximenes, ba ninia dedikasaun no kompeténsia sira ne’ebé hala’o iha ninia mandatu (rua tuituir malu) ne’ebé ramata iha 27 abril 2021.Iha ninia mandatu, Dr. José da Costa Ximenes halo esforsu sira ne’ebé nia bele, tuir ninia kbiit, hodi haburas organizasaun ne’ebé nia pertense ba, ho kontribuisaun mós atu kombate kriminalidade iha Timor-Leste.

“Ba hahalok sira ne’e hotu, ha’u hato’ o ba Dr. José da Costa Ximenes ha’ u-nia agradesimentu ba nia lala’ ok no susesu iha mandatu rua tuituir malu, nu’ udar Prokurador-Jeral Repúblika. N° 3 artigu 132° Konstituisaun RDTL hatete katak majistradu sira iha Ministériu Públiku, banhira hala’ o sira-nia knaar, sira submete ba kritériu sira kona-ba legalidade, objetividade, izensaun no tenke haktuir diretiva no órden sira iha lei laran. Importante tebes haktuir prinsípiu sira ne’e, la’ós de’ it atu hasa’e Majistradu Ministériu Públiku ida-idak ninia integridade pesoál maibé atu fó mós prestíjiu ba instituisaun ida ne’ebé Majistradu sira servisu ba,” Saudasoens Presidente.

Alende, Majistradu Ministériu Públiku no autor sira seluk ne’ebé halo parte sistema justisa formal labele permite intervensaun polítiku-partidária iha sira-nia lala’ ok. Sira-nia lala’ ok labele mós politiza (ka pior liu, partidariza fali) atu satisfáz de’it forsa politiku-partidária ruma. Bele haliis ba forsa polítiku-partidária ruma maibé labele kahor gostu pesoál ho lala’ok profisionál.

Portantu, Ba knaar sira ne’ebé pertense ba Ministériu Públiku, presiza iha duni kondisaun ka fasilidade natoon. La’ ós justu ezije kumprimentu dever maibé la fó kondisaun ka fasilidade natoon hodi sira bele hala’ o sira-nia knaar. Tanba ne’e, presiza duni hadi’ak kondisaun ka fasilidade sira atu Majistradu sira iha Ministériu Públiku bele hala’ o sira-nia knaar ho susesu.

Nia Relata Katak, Ita-nia sistema justisa formal sei iha nafatin problemas oin-oin. Ida mak prosesamentu kazu la’o kleur liu tanba falta rekursus umanus no falta aptidaun téknika kona-ba matéria espesializada. Ita tenke rekoñese ita-nia pontu fraku sira atu ita bele hadia’k-an liuhusi kapasitasaun no bele hadia’k liutan servisu. Ho rekoñesimentu ida ne’e mak ita harii baze ba kapasitasaun no hadi’ak-an babeibeik.

“Ha’u hatene katak iha dadaun esforsu atu rezolve problemas balun ita hasoru hela iha sistema justisa formal. Esforsu boot ne’ebé dada ona ita-nia atensaun mak proposta ida husi Governu ne’ebé tama foin lalais ne’e iha Parlamentu Nasional atu altera Estatutu Ministeriu Públiku nian. Ha’ u hein katak inisiativa atu muda lei ne’e bele kontribui ba prosesu koletivu atu rezolve problema balun ne’ebé mosu iha Ministériu Públiku,” Salienta Presidente.

Ne’e Dunik, Sura ho ita nia kbit rasik mak baze uluk liu atu ita haforsa ita-nia instituisaun sira. Fiar ita-nia an rasik signifika mós rekoñese katak ita iha limitasaun no tanba ne’ e ita tenke husu asesoria espesializada nu’ udar dalan ba ida ba ita haklean koñesimentu no esperiénsia sira ne’ebé ita seidauk iha. Tanba ita uza asessoria espesializada, ida ne’e la signifika katak ita lalika halo ona esforsu rasik. Importante tebes halo esforsu rasik iha instituisaun laran atu ita bele hadi’ak- an liután no babeibeik no haforsa babeibeik ita-nia instituisaun sira.

Presidente relata, Hatene klean lian portugés sei nafatin kestaun boot ida iha sistema justisa formal. Konstituisaun rekoñese Tetun no Portuges nu’ udar lian ofisiál. Hare’e ba situasaun lian Tetun nian ohinloron, importante tebes halo parseria ho lian portugés, nu’udar dalan atu moderniza Tetun. Prosesu ne’e sei han tempu. Ida ne’e signifika ita sei uza Portugés liuliu iha ita-nia lejislasaun ba tempu naruk. Ita haree katak ita-nia ema seidauk domina portugés, lian ko-ofisial Timor-Leste nian. Ida ne’e pontu fraku ida no tanba ne’e, ita tenke halo investimentu liután atu kapasita ita-nia ajente justisa sira.

Nune’e, Artigu 26 ° husi Lei Inan nian garante ba hotu-hotu, direitu fundamental atu iha asesu ba Tribunal sira atu defende direitus no interesses tuir lei haruka. Atu hetan direitu ida ne’e, ita tenke haka’as-an atu hala’ o traballu koletivu babeibeik. Hotu-hotu ne’ebé iha kompeténsia iha sektor justisa formal Estadu nian, entre sira ne’e, Juíz sira, Prokurador sira, Defensór Públiku sira, Advogadu sira, Ofisial Justisa sira no membru Polísia sira bele konta ho ha’ u-nia apoiu pesoál no apoiu institusional husi Prezidénsia Repúblika iha prosesu hato’o servisus ba ita-nia Povu, maibé, ita hotu sei haktuir beibeik prinsípiu katak entidade ida-idak iha nia kbiit keta-ketak.

PR dehan, Ba Prokurador-Jeral Repúblika hotu-hotu no sira ne’ebé fó-an tomak atu haburas Majistratura ida ne’e husi kedas Restaurasaun Independénsia Timor-Leste no hamutuk konsege hakaat difikuldade oin-oin, ha’u hakarak hato’o votus parabéns ba servisu exelente ne’ebé imi hotu halo to’ o ohinloron, iha territóriu laran tomak.
“Ha’ u husu nafatin ba hotu-hotu atu halo esforsu liután atu hadi’ak liután instituisaun sira ne’ebé hala’o justisa formal Estadu nian. Husi prokurador sira hotu iha nível sub-nasional no husi interveniente no kolaborador sira seluk, ha’ u hein katak sei kontinua kolabora ho forma di’akliu ho Prokurador-Jeral foun atu instituisaun ida ne’e bele hala’ o ninia knaar ho rigor liután, efisiénsia, lais liu, ho kualidade no kredibilidade as liu no nune’e, konkista liután no babeibeik konfiansa husi ita-nia Povu,” Hamenu PR.

Nia salienta, Atu hala’ o ho di’ak ninia knaar nu’ udar Majistradu as liu iha instituisaun Estadu ida ne’e, Dr. Alfonso Lopez sei konta ho apoiu institusional husi órgauns soberania no en-partikular ho konfiansa Prezidente Repúblika nian. “Ha’u nia votus susesu ba ita-nia Prokurador-Jeral Repúblika, Dr. Alfonso Lopez. Hamutuk ita kontinua luta ba Timor-Leste ne’ebé justu duni, ho justisa ba ema hotu,” PR rai hela Mensajem (BT)