DÍLI----Relasiona ho problema disputa rai ne’ebé akontese iha area Khirlita no Thoki-Boro entre suku tolu hanesan Uatu-Haco, Uai-Laha no Uai-Oli iha Postu Administrativu VENILALE, Munisipiu Baukau ne’ebe rezulta Lutu, Uma-Natar no Ponte hetan estragus, reprezentante Juventude Venilale-Oan lamenta tebes.

Tuir Reprezentante Juventude VENILALE husi Suku Uatu-Haco, Uai-Laha no Uai-Oli Porta-Voz, Juvencio Matos Guterres hatete, hanesan reprezentante juventude Venilale-oan husu ba Lideransa Komunitaria atu servi povu tuir Lei husi Ministeriu Administrasaun Estatal (MAE) ne’ebe kria estabilidade iha komunidade nia le’et.

“Hakarak solisita ba Prezidente autoridade Munisipiu atu toma medida ba aktu refere hodi nune’e lideransa sira servi tuir lei ne’ebé iha no ba Ministerio Administrasaun Estatal (MAE) atu toma medida ba aktu ne’ebé halo husi lideransa suku sira hodi destabiliza estabilidade iha VENILALE,” dehan Porta-voz ka Reprezentante Juventude VENILALE husi Suku Uatu-Haco, Uai-Laha no Uai-Oli, Juvencio Matos Guterres ba Jornalista sira iha nota komunikadu Imprensa, iha Kaikoli, Sabadu (24/04).

Nia hatutan, Juventude sira husu Autoridade lokál suku tolu, Uatu-Haco, Uai-Laha no Uai-Oli hamutuk ho administrador VENILALE atu halo dezena mapamentu ne’ebé klaru nune'e labele hamosu konfuzaun iha komunidade suku tolu. “Husu ba xefi Suku Na'in tolu atu tur hamutuk hodi rezolve problema emediatamente nune’e labele perturba aktividade hortikultura.

Aktus sobu lutu, sunu uma, sobu ponte, tuda uma, passa revistas ba estudantes, tolok, hasai liafuan milisias, besi mera putih, anti Makasae no midiki ne'e hanesan aktus krimi, diskriminativu no la-edukativu, ne'e la akumula maibé hafahe komunidade tamba ne’e husu ba polisias eskuadra VENILALE servisu hamutuk ho autoridade lokál suku tolu no administrador VENILALE atu toma medida lalais,” Esplika nia.

Nia haktuir mos katak, Husu ba Xefi suku na'in tolu atu labele organiza joven hodi soran komunidade suku tolu hodi destabiliza estabilidade iha postu VENILALE, liu-liu suku tolu, Ho ida ne ami reprezentante juventude Venilale-oan kondena hahalok sira hanesan: Lider ne’ebé organiza massa hodi sobu ponte no sunu lutu, ne'e aktu kriminozu, Lider ne’ebé organiza massa hodi hasai lia-fuan la edukativu ne'e aktu bandalizmu, Lider ne’ebé organiza massa hodi passa revista komunidade no estudante sira ne'e aktu brutalizmu.

Ikus liu ami reprezentante Venilale-oan hakarak alerta liuhusi media ida ne’e katak laiha VENILALE-Makasae, laiha VENILALE-Midiki, laiha VENILALE-Uaimoa maibe VENILALE-Ida De’it. Hamutuk maske diferensias, ita nia diferensias mak ita nia obra kulturais hodi haburas unidade nasionál. (BT)