DÍLI----Durante loron tolu (Sexta, Sabadu too Domingo Matrugada, komesa udan no anin rezulta inundasaun iha Kapitál Díli, konsege hamate komunidade balun no estragus sasan komunidade sira nian, hanesan infraestrutura privadu no públiku iha Kapitál Díli.

Ho situasaun ida ne'e, Primeiru Ministru (PM) Taur Matan Ruak manifesta Soliedaridade no Kondelénsia ba família no Komunidade ne'ebé mak lakon vida no lakon sasan kauza husi dezastre naturais. “Primeiru-Ministru Taur Matan Ruak hodi Governu no ha’u nia naran rasik hakarak hato’o ha’u nia solidariedade no kondolénsias ne’ebé kle’an ba família matebian sira ne’ebé mak sofre hosi inundasaun ida ne’e,” Nota Informasaun Mensajen Xefe Governu liuhusi komunikadu imprensa ne'ebé Jornalista Business Timor (BT) asesu iha loron Domingu (04/04).

Xefe Governu Taur Matan Ruak deklara katak senti laran triste hare ba situasaun no inundasaun ne'ebé mak akontese iha Komunidade, hodi hamate Komunidade balun no estragus sasan. “Ha’u-nia laran triste tebes, wainhira haree dezastre naturál ka udan bot, ne’ebé hamosu estragus maka’as no halakon komunidade nia vida, aproveita momentu susár ida ne’e, hakarak fahe ha’u nia sentimentu solidariedade ba vítima sira no família vítima sira nia sofrimentu,” Dehan PM Taur

Primeiru Ministru dehan, Xefe Governu iha momentu ida ne’e, reza ba vitima sira atu oinsa bele hetan forsa nafatin hodi ultra-pasa situasaun ne’ebe akontese iha Timor Leste tomak ne’ebe ema hotu infrenta iha destre natural. “Ikus, ha’u nia orasaun hamutuk ho vítimas no família sira, ha’u dezeja forsa iha tempu susár ida-ne’e, no hein katak, ita hotu seí ultrapasa hosi sofrimentu ida ne’e, no Governu seí halo esforsu hotu hodi ajuda família sira ne’ebé saì vítima ba dezastre naturál ida ne’e,” Informa nia.

Lalehan Tanis Estraga Komunidade Pantai-Kelapa Nia Uma No Sasan

Entretantu, abitente Tarcisio Da Costa haktuir ho triste katak Udan ben hanesan natureza, ne'ebé tun husi lalehan hodi habokon foho lolon, tun ba mota, hodi tun ba estraga komunidade nia uma no sasan iha kapital Dili tomak, tanba iha Pantai-Kelapa, Bairo Zero III, Suku Fatuhada, Postu Administrativu Dom Aleixo, Munisípiu DÍLI deit hare sai tiha lagoa iha uma sor-sorin.

Situasaun ida ne'e, halo komunidade Bairo Zero III, Suku Fatuhada, Postu Administrativu Dom Aleixo, Munisípiu DÍLI senti laran triste, nune'e husu ba Ministériu relevante hodi buka meius atu foti solusaun lalais. “Situasaun ida ne'e problema husi natureza, ne'ebé ami labele fó kulpa ba ema ruma, maibé ami nia sujestaun ba estadu liu-liu oinsá mak bele iha politika no planu ne'ebé mak di'ak, nune'e bele loke baleta sira ne'ebé mak iha área komunidade sira hela ba,” Dehan abitente Tarcisio Da Costa.

Nia fundamenta katak inundasaun ida ne'e hanesan problema sériu ba komunidade sira, nune'e husu ba Ministériu relevante sira hodi foti medidas ne'ebé mak riguroju. “Problema situasaun hanesan ne'e, sira sempre problema ho inundasaun, ne'ebé mak ami Komunidade infrenta dau-daun ne'e, nune’e, nu'udár komunidade, sujere ba Governu liu-liu Ministériu ida ne'ebé mak responsablidade ba situasaun ida ne'e, husu atu bele rekoñese sériu, ne'ebé mak komunidade sira iha área Pantai-Kelapa infrenta tanba ho inundasaun ne'ebé mak akontese, agora dau-daun, ami hakarak hateten, la'os ami de'it mak infrenta, maibé kuaze maiória mak infrenta ba inundasaun ida ne'e, tanbá ami senti afeitadu tebés ho ami-nia sasan iha uma laran kuaze estragus hotu, no laiha fátin hodi asegura sasan sira ne'ebé mak hetan estragu,” Salienta nia.

Alende ne'e mós nia esplika, Iha ne'e kuaze sasan barak mak hetan estragus iha uma laran, hanesan sasan báziku sira, Esprinbet, Sofa no sasan básiku no sasan kios sira kuaze estrgaus totál. “Dezastre hanesan ne'e dala rua ona, hahú uluk iha tinan 2017 mós akontese, maibé ladun estragus sasan, no be mós ladun nalihun hanesan ne'e, no ita bele salva sasan ruma, maibé agora laiha sasan hanesan dokumentu sira ne'e la salva hotu,” Hateten Tarcisio.

Nia dehan, Kada tinan udan sempre akontese hanesan ne'e maibé akontese inundasaun hanesan foin mak primeira ves akontese iha ne'e. Situasaun ne'ebé mak akontese, husu ba Governu iha posivel hodi bele fó ajuda, tanbá iha fátin ida ne'e, maiória estudante mak barak, no ema vulneravel mós barak, ho ida ne'e, husu ba Ministériu Soliedaridade Sosiál no Inkluzaun (MSSI) bele fó apoiu urjenti, tanbá iha uma balun ne'ebé mak akontese to'o agora laiha fátin di'ak hodi deskansa.

Entretantu Observasaun Jornalista iha terenu nota katak, inundasaun ne'e mosu Be komesa tama uma laran hafoin komunidade sira evakua sira nia motorizada hodi hadok husi inundasaun ne'e. Alende ne'e mós mós maske dau-daun ne'e iha hela serka sanitária konfinamentu no obrigatóriu, maibé komunidade maiória la uza maskra no la kumpri distansiamentu sosiál, tanbá konsentrasaun ba sira nia sasan hodi salva. (BT)