VENILALE – Populasaun suku Bado-hoo sub distritu Venilale distritu Baucau maioria sente hetan ona venifisiu husi programa governu nian ne’ebe durante ne’e implementa iha subdistritu Venilale liu-liu iha suku Bado-Hoo. “Kona ba dezenvolvimentu iha suku laran ita hare povu barak mak hetan ona benifisiu husi programa governu nian ne’ebe mak iha, “ dehan Manuel Guterres, xefi suku Bado-Ho’o ba BT iha nia knar fatin segunda feira (16/04).

Manuel esplika katak durante ne’e populasaun maioria halerik ba iha Estrada, eletrisidade no mos bee-moos. Maibe liu husi programa governu nian agora konsege implementa hodi hatan ba iha problema ne’ebe povu sira halerik liu-liu estrada no eletrisidade. Tuir nia katak wainhira Timor Leste hetan independensia, estrada no eletrisidade sai prekupasaun boot ba iha komunidade sira atu bele asesu maibe liu husi politika governu, povu sira konsege asesu estrada, bee-moos no eletrisidade iha sira nia hela fatin.

“It a bele hatete katak povu barak ona hetan benifisiu, laos dehan hetan total ona maibe maioria hetan hanesan eletrisidade uluk suku Bado-hoo la hetan maibe oras ne’e sira asesu ona no Estrada. Komunidade sira hetan ona hanesan aldeia Caiatula uluk estrada laiha maibe oras ne’e sira mos hetan,” dehan nia. Alende kona-ba estrada no eletrisidade, tuir nia, populasaun aldeia balu konsege asesu ba iha mini merkadu liu-liu aldeia Uaicana tanba programa MED konsege hari merkadu iha aldeia refere hodi populasaun sira faan sira nia produtu lokal ne’ebe sira iha.

Tan ne’e nia sei promote ba iha povu suku Bado-Hoo katak nia prontu nafatin buka dalan hodi bele hatan ba problema balun ne’ebe povu sira hasoru liu konaba problema dezastre naturais iha tinan ida ne’e. Iha Banana hanesan Domingas do Rego, komunidade suku Bado- Hoo sente kontenti tebes tanba durante tinan barak sira halerik ba iha estrada, bee-moos no eletrisidade, governu konsege implementa duni hodi hatan ba iha prekupasaun povu nia.

“Hau sente haksolok tebes tanba durante tinan barak ami nunka hetan eletrisidade hahu husi tempu Indonesia to’o ohin loron ita indepedensia maibe oras ne’e ami asesu ona eletrisidade iha ami nia uma,” dehan Domingas ho oin-midar. Nia mos hato’o agradese ba governu ne’ebe konsege hatan prekupasaun povu sira iha baze. Iha parte seluk Venancio A. Guterres husi suku Uatu- Haco aldeia Areia sente orgulhu boot ho programa governu nia ne’ebe konsege implementa programa hodi hatan ba iha prekupasaun povu nian.(R-3)