DÍLI----Bankada Kmanek Haburas Unidade Timoroan (KHUNTO) Deputada Olinda Guterres husu no sujere ba Deputadu sira atu ko’a saláriu kada fulan 50% hodi fo ajudus ka atende emerejensia ba estudante sira ne’ebe mak hela iha Kost.

“Ha’u Sujere ba Parlamentu katak se bele ita labele husu ba Governu de’it maibé ita deputadu na’in-65 ne’e husi munisipiu 13 pelumenus 50% husi ita-nia salario, tau bele ajuda ita-nia oan sira husi munisipiu hotu-hotu,” Hateten Deputada Olinda Guterres iha sesaun plenaria, Iha Uma-Fukun PN, Segunda (22/03).

Nia Informa, iha Parlamentu ne’e atu bele tau osan oituan, duke ita loro-loron preokupa ba estudante sira ita nudar Humanu ita parlamentu ida ne’e ita ko’alia ba sira-nia nesesidade, ko’alia ba estudante sira-nia preokupasaun. Hanesan reprezentante puvu iha uma-fukun ida ne’e, relata lia hirak ne’e tanba rezolusaun Governu liuhusi reuniaun Konsellu Ministru deside extende serka sanitaria no konfinamentu obrigatóriu (lockdown) iha Munisípiu Dili hahu husi loron 16 Marsu, sei termina iha 2 Abril, entaun presiza fo apoiu ba sira.

“Estudante sira ne’e dook husi Inan-Aman, ita deputadu sira ne’e laos sira mak hili ita mai tur iha ne’e, sujestaun ha’u nia maka ne’e deputadu sira ne’e nia saláriu laos ko’a fulan hotu lae maibe fulan ida nian ko’a 50% ba estudante sira ne’ebé maka oras ne’e seidauk simu,” Haktuir nia. Nune’e, Deputada Olinda husu maluk Deputadu sira hotu nia konsensia atu tau hamutuk osan hodi atende netik situasaun ne’ebé mak dadaun ne’e estudante sira iha Díli infrenta. (BT)