DÍLI----Pandemia Global hada’et ho naran Corona Virus 2019 (COVID-19) dadaun kontinua sirkula tanba kazu detektadu na’in-1 husi munisipiu Lautem (Lospalos) ohin, maibe lahatudu sintomas, Nune’e, total pasiente ne’ebé ekipa saúde sira asegura ona iha sala izolamentu Vera-Cruz no Tasi-Tolu sa’e ba 211.

Tuir Ofisial Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo haktuir katak kazu foun hirak ne’e identifikadu hafoin ekipa husi Sentru Integradu Jestaun Krize (SIJK), horiseik to’o ohin dader foti amostra husi ema hirak halo kontaktu ho pasiente pozitivu COVID-19 ne’ebé husi Dili na’in-4, Vikeke na’in-4 nomos Lautem na’in-1.

“Kazu foun ohin na’in-9, Kazu rekuperadu na’in-4, Kazu ativu iha sala Izolamentu na’in-211, Kazu nain-9 ohin, iha mane nain-2, feto nain-7, Ema ho idade tinan 8-11 na’in-2, Ema ho idade entre tinan 19-42 na’in 7, Ema sintomátiku na’in-1, Ema asintomátiku na’in- 8,” Hateten Ofisial Kordenador Forsa-Tarefa ba Prevensaun no Mitigasaun Surtu Covid-19, Rui Maria de Araújo ba Jornalista sira liu husi Video ZOOM, iha SS-SIJK, Segunda (22/03)

Nia haktuir, Iha Munisipiu Dili iha kazu foun-4, ho detalles Kazu pozitivu-1, hela iha Aninfuik, Suku Kampu-Alor, Posto Administrativu Dom Aleixo, Kazu pozitivu-2, hela iha Aldeia Bidau Tokobaru 2, Suku Kulu-Hun, Postu Administrativu Kristu Rei, Kazu pozitivu-1, hela iha Aldeia 20 de Setembru, Suku Bebonuk, Postu Administrativu Dom Aleixo.

Alende ida ne’e Kazu Na’in-5, Na’in-4 husi Munisipiu Vikeke, Hamutuk hotu Munisipiu Vikeke detekta ona kazu konfirmadu na’in-8. Kazu foun hirak ne’e, hela iha Aldeia Mamaluk (Beloi), Suku Karaubalu, Vikeke. Kazu konfirmadu hirak ne’e kontaktu-besik ho profisionál saúde ne’ebé halo kursu pós-laboral iha UNTL no fila husi Dili ba Vikeke iha dia 8 de Marsu. Entretantu kazu foun ida husi Munisipiu Lautem, Kazu ida ne’e halo viajen husi Dili ba Lautem iha dia 18 de Marsu de 2021.

Kazu pozitivu ne’e estudante UNITAL, iha Lautem hela iha Aldeia Reisoru, Suku Home, Lospalos Vila. Iha Dili hela iha Aldeia Bedois, Suku Kamea. Nafatin apela ba populasaun ne’ebé saí husi Dili ba munisipiu sira seluk, entre Loron 5-9 Fulan Marsu madrugada, molok serka sanitaria hahú tama iha vigor iha Dili, atu favor ida aprezenta-an ba autoridade saúde sira ne’ebé besik-liu, iha imi nia hela fatin, hodi bele hetan atendimentu.

Apela mós ba komunidade iha munisipiu sira hotu, wainhira hatene kona-ba ema ruma ne’ebé sai husi Dili molok serka sanitaria hahú iha Dili, halo favor informa hela autoridade sira atu bele halo atendimentu ba sira. Relasiona ho Kazu iha Díli Laran ne’ebé mak numeru sempre aumenta kada loron, SIJK Apela mós ba populasaun iha Munsipiu Dili no mós munisipiu sira seluk, wainhira sente isin manas, kakorok moras, inus-ben, mear, favor hakat ba Sentru Saúde ne’ebé besik-liu atu bele hetan atendimentu.

Nune’e em nome governu ka Sentru Integradu Jestaun Krize husu ba populasaun iha Dili laran tomak, atu nafatin kalma, lalika pániku, halo tuir regra konfinamentu domisiliáriu jeral, fo’o tempu ba ekipa konjunta saúde buka tuir kontaktubesik sira hotu. Hakarak apela ba populasaun iha Covalima, atu nafatin disiplina iha medidas protesaun no ijiene pessoál, no evita hakat ba-mai iha fronteira.

Apela mós ba populasaun Timor-Leste tomak, liu-liu iha munisipiu sanulu seluk ho RAEOA atu tu’ur hakmatek iha fatin, atu nafatin matan-moris neon nain, pratíka nafatin medida sira ne’ebé ita hotu hatene ona. “Uza maskra, fase liman beibeik ho sabaun ka dezinfetante ruma, evita kose liman ba matan, inus ho ibun, wainhira kumprimenta malu, lapresiza ka’er liman, bensa-liman, rei-malu ka haku’ak malu, evita halibur malu barak, hamri’ik ka tur do’ok husi ema seluk, mínimu metru ida ho balun.” Informa nia. (BT)