DÍLI----Pandemia Global hada’et ho naran Corona Virus 2019 (COVID-19) dadaun kontinua invade tanba kazu detektadu aumenta ema na’in-19 husi Kapital Dili ohin, Nune’e, total pasiente ne’ebé ekipa saúde detekta husi kapital Dili na’in-136 fahe ba cluster34, namkari iha instituisaun 4, eventu 1 no Suku 10, no fatin kuarentena 1.

Ofisial Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo haktuir katak kazu foun hirak ne’e identifikadu hafoin ekipa husi Sentru Integradu Jestaun Krize (SIJK), horiseik to’o ohin dader foti amostra husi ema hirak halo kontaktu ho pasiente pozitivu COVID-19 ne’ebé antes iha Tasi-Tolu no Bebonuk.

“Ohin iha Munisipiu Dili iha kazu foun 19,” Hateten Ofisial Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo liuhui Konferensia Imprensa iha Sala Situasaun Merkadu Lama, Sabadu (20/03).

Nia hatutan, Kazu pozitivu-3, kontaktu-besik ho kazu konfirmadu iha BTN III, Aldeia Terra Santa, Suku Madohi, Postu Administrativu Dom Aleixo. Kazu pozitivu-1, kontaktu-besik ho kazu iha cluster Aldeia Maucocomate, Suco Becora, Posto Administrativo Cristo Rei. Kazu pozitivu-2, kontaktu-besik ho kazu konfirmadu ida iha cluster HNGV, hela iha Aldeia Berbidu, Suku Becora, Posto Administrativu Cristo Rei. Kazu pozitivu-1 hela iha Aldeia Bidau Tokobaru 2, Suku Kulu-hun, Postu Administrativu Cristo Rei. Pozitivu ida ne’e kontaktu-besik ho kazu iha cluster Aldeia Lirio, Suco Motael, Posto Administrativo Vera-Cruz.

Nune’e, Kazu pozitivu-10, hela iha Aldeia 20 de Setembro, Suku Bebonuk, Postu Administrativu Dom Aleixo. Pozitivu hirak ne’e kontaktu-besik ho kazu iha cluster hanesan. Kazu pozitivu-1, hela iha Aldeia Grilos, Suku Gricenfor, Postu Administrativu Nain Feto. Pozitivu ida ne’e kontaktu-besik ho kazu husi cluster balun iha Comoro. Kazu pozitivu-1, hela iha Aldeia Gideon, Suku Vila-Verde, Postu Administrativu Vera-Cruz. Pozitivu ida ne’e kontaktu-besik ho kazu husi cluster HNGV.

Ho nune’e, kazu detetadu ka pozitivu iha Munisipiu Dili husi dia 7 de Marsu 2021, to’o ohin, 20 de Marsu de 2021, hamutuk hotu 136. Ho baze ba informasaun ne’ebé ekipa konjunta saúde nian rekolle, foku/cluster kazu pozitivu iha Dili, hetan revizaun hanesan Kazu detetadu 136 iha Dili ne’e, fahe ba cluster 34, namkari iha instituisaun 4, eventu 1 & Suku 10, no fatin kuarentena 1, iha Postu Administrativu Dom Aleixo, Vera-Cruz, Nain Feto ho Cristo Rei. Husi cluster 34 ne’ebé iha, liu 50% mak la ativu ka, sira nia kazu la aumenta iha semana ida ikus, hanesan pur ezemplu cluster MTC, SEFOPE, Ministeriu Finansas ho tan sira seluk.

Entretantu, atividade prevensaun no mitigasaun covid-19 iha munsipiu sira seluk no RAEOA 1. Depois Munisipiu Baukau ho Munisipiu Vikeke ohin laiha kazu foun. Dadus ne’ebé iha, pur enkuantu hatudu katak kazu hirak ne’ebé detetatu iha Baukau (na’in-8) no iha Vikeke (na’in-3), nu’udar kazu ne’ebé lori sai husi Dili, entre dia 5 ho 9 de Marsu de 2021. 2. Atividade prevensaun no mitigasaun Covid-19 iha Munisipiu sira seluk la’o hanesan baibain.

Portantu, Dadus Jeral husi Kazu foun ohin na’in-19, Kazu rekuperadu na’in-3, Kazu ativu-154. • Kazu na-in-19 ohin, iha mane na’in-6, feto na’in-13. Ema ho idade tinan 13, Ema ho idade entre tinan 16-79 na’in-18. Ema sintomátiku-3, Ema asintomátiku-16. Husi horiseik mai ohin hamutuk hotu halo 628 testes PCR.

Ne’e Dunik, ninia esplikasaun adisional hanesan hareé ba kazu ne’ebé aumenta ida Dili, no kazu ne’ebé deteta iha Munisipiu Baukau ho Vikeke, nu’udar kazu ne’ebé ‘’esporta’’ husi Dili, autoridade kompetente sira foti ona desizaun atu impoin medida adisionál, ho objetivu prevene hada’et-tutan moras ne’e husi Dili ba Munisipiu seluk.

Nia haktuir, Fo’o hanoin mós ba públiku katak, Sekretariadu Estadu Maior Kordenador CIGC-SS mak sei fo’o informasaun ba Laboratoriu Nasional, kona-ba ema sira ne’ebé prienxe kritériu tuir Rezolusaun Nº15/2021, no tenki halo análize. Laboratóriu Nasional sei la atende ema ne’ebé nain-rasik ba husu atu halo análize, hodi halo viajen sai husi serka sanitária iha Munisipiu Dili.

“Apela ba populasaun ne’ebé saí husi Dili entre dia 5 to’o dia 9 de Marsu madrugada, ba munisipiu sira seluk, molok serka sanitaria hahú iha Dili, atu favor ida aprezenta-an ba autoridade saúde sira ne’ebé besik-liu, iha imi nia hela fatin, hodi bele hetan atendimentu. Apela mós ba komunidade iha munisipiu sira, wainhira hatene kona-ba ema ruma ne’ebé sai husi Dili molok serka sanitaria hahú iha Dili, halo favor informa hela autoridade sira atu bele halo atendimentu ba sira,” Informa nia. (BT)