DILI-Oganizasaun mikro kreditu Moris Rasik ne’ebe hari iha tinan 2002 to’o ohin loron konsege fo kreditu ona ba ema hamutuk 13.000 iha nasaun foun ne’e.Diretora Moris Rasik, Lola dos Reis esplika kliente sira ne’ebe presiza finanseiru atu halo kreditu primeiru, ba povu baibain sei hetan deit $100 no la liu husi montante ne’e. Montante kreditu ba funsionariu sira ki’ik liu $400 no bisnis $800.

Nia esplika se grupu ne’ebe halo ona imprestimu mak nia jere osan ho diak no nia bisnis konsege la’o diak, moris, sei hasae nia kapital kreditu ba $3000 no ba funsionariu mos hanesan. Mais, boot uitoan bele to’o U$15.000. Kuandu, sira selu hotu hakarak kontinua bele aumenta tan montante osan kreditu ba sira maibe nia montante la liu $3.000.Nia atu asesu ba kreditu lalais liu kliente sira tenke forma grupu no iha grupu ne’e nia laran ema nain lima (5).

Nia informa oras ne’e daudaun Moris Rasik nia kliente sei iha distritu lima no iha tempu badak sei haluan ba distritu tomak.“Kliente Moris Rasik ne’ebe oras ne’e ejisti iha distritu sira mak hanesan distritu Likisa nia kliente 1.300, Aileu 1.500, Ermera 1.500, Covalima 700, Bobonaro 700. Tanba ne’e to ohin loron Moris Rasik nia kliente etinji ona 13.000,” hatete Lola dos Reis ba Business Timor 12 Juñu iha Mandarin, Dili.

Diretora ne’e hatete maske to’o ohin loron sira nia kliente hamutuk ona 13.000, seidauk kobre hotu persentajen ema kiak iha TL. Tuir estatistika ne’ebe fo sai foin lalais ne’e liu husi Sensus fo Fila, ema ne’ebe iha linha kiak nia okos atinji 5.000 tanba ne’e sira sei kontinua atu kobre hotu iha TL.Razaun Moris Rasik atu kobre distiru sira atu fo kreditu ba komunidade sira mak atu fo osan ba komunidade sira hodi nune’e osan ne’ebe sira hetan bele sirkula mos iha baze hodi haboot atividade ekonomika iha distritu idak idak.Moris Rasik hahú fo kreditu iha tinan 2000 to’o ohin loron ho nia misaun mak atu ajuda fo kreditu ba ema feto faluk no kiak iha area rural sira hodi sustenta nia familia uma laran.(R-5)