PONILALA—Komunidade iha Aldeia Hatuposi no Sakoko, Suku Ponilala Distritu Ermera kestiona benefisiu husi EDTL hosi sentral eletrisidade Hera tanba to’o oras ne’e sira seidauk hetan eletrisidade. Komunidade aldeia rua ne’e husu ba SEAU atu haruka ekipa ida tun hodi observa realidade ida ne’e.

Jorge Madeira, estudante secundaria Ermera, Segunda (05/06) hateten to’o agora iha aldeia rua ne’e mak seidauk hetan eletrisidade. Estudante ne’e rekoñese hetan ona informasaun husi kompañia Habelar Unipesoal Lda nebe kaer projetu eletrisidade ba suku Ponilala iha 17 Janeiru 2012 katak total uma kain atus tolu (300) sei asesu eletrisidade maibe realidade foin mak atus rua (200) mak hetan ona.

Jorge mos hatete, tuir planu uma kain ida uza meteran ida, maibe realidade komunidade sira nebe asesu ona ahi ne’e, uma kain rua uza meteran ida.Entertantu Xefi Suku Ponilala Jacinto Madeira Martins hateten lia ida ho saida mak Jorge hatete katak iha uma kain atus tolu resin maibe atus rua mak hetan ona eletrisidade 100%.Lider komunitaria ne’e hatete povu nia lamentasaun hato’o ona ba iha kompañia maibe seidauk hetan resposta. Estudante sira ne’e mos hato’o tiha ona proposta ba SEAU maibe seidauk iha rezultadu pozitivu.

Hatan ba problema ne’e, Xefi SEAU Distritu Ermera Januario da Costa hateten katak buat sira ne’e la tuir nia regra, laiha ida mak bosok malu. Karik instala uma atus tolu tenki dehan uma atus tolu, atus rua ka atus ida.“Tanba tuir dokumentu ne’ebe iha, se karik servisu liu atus tolu halo fali manajamentu ida iha surat tahan kontratu laran katak servisu liu. Se menus ida ne’e halo tan amandemen ida dehan menus sasan hotu, sira nia material mak la to’o.

Nia promete sei haruka tan tekniku sira atu hare no hatene lolos problema ne’e. Se hare uma la hetan ahi, tekniku hasa’e presu tenki lao tuir nia regra ne’ebe iha, labele liu fali regra sira ne’e.Ahi ne’ebe mak sei husik hela no sei funsiona, tuir Januario, iha futuru halo dala ida deit. Labele fo razaun osan la to’o. Maibe agora iha ona ema hotu hakarak ona entaun lakleur tan to’o duni iha ita boot sira nia uma.(R-4)