DILI–Ministeriu Agrikultura no Peskas (MAP) fahe ona animal ka balada-hakiak hanesan manu, fahi, bibi, kuda, karau vaka no timur ba grupu agrikultor sira iha teritoriu tomak hamutuk iha 3439. Tuir Direktor Nasional ba Apoiu Agrikola Januario Marçal katak ajuda governu ne’e tuir politika MAP ninian atu redus kiak no kria servisu ba joven foin sa’e agrikultor sira.

MAP, tuir Januario, sei fo apoiu nafatin ba agrikultor sira ne’ebe hela iha rai luan atu nune’e bele hakiak animal hodi nune’e bele sustenta fali sira nia moris.“Ami husi ministeriu agrikultura mos fo apoiu ba agrikultor sira konaba karau, bibi, fahi, ba iha rai sira ne’ebe maka potensia duni para ita atu hakiak animal,” hateten nia ba BT iha MAP Komoro, tersa semana kotuk.

Nia deklara katak iha tinan 2008 no 2009 MAP aloka ona orsamentu rihun $300.00 hodi fo apoiu ba agrikultor sira hakiak animal,ne’ebe bolu ho sistema revolu, katak karau ne’ebe sira fo apoiu ho nia durasaun durante tinan lima (5), hafoin intrega fali ba MAP atu nune’e apoiu fali agrikultor sira seluk. “Agora ne’e ita halo hela akompañamentu iha terenu husi ami nia tekniku husi pekuaria nian tanba karau ne’e uluk ita ajuda ba grupu, (nain 5) karau sanulu entaun sira ne’e nain ida rua-rua no orsida sira ne’e maka to’o tinan lima nia rai hela nia oan, inan dada fali hodi fo fali grupu sira seluk, ne’ebe ami bolu sistema revolu,” hateten tan.

Tuir dadus ne’ebe BT rekolla konaba distribuisaun animal-hakiak iha tinan 2008, karau vaka hamutuk 238, karau timur hamutuk 139, kuda hamutuk 11, fahi hamutuk 177, bibi hamutuk 138, manu hamutuk 936. Ba tinan 2010 total distribuisaun ba animal-hakiak hamutuk 1800, total husi tinan 2008 no 2010 total animal 3439, ne’ebe distribui tiha ona ba agrikultor sira iha 13 distritu. (R-2)