DĺLI----Konsellu Ministru Hili Ministru Finansas MF Rui Augusto Gomes Reprezenta Governu Timor-Leste asina akordu ho Estadus Unidus Amérika liu husi United States Agency for Internasionál Development (USAID) atu haree ba dezenvolvimentu Setór Naun Petroliferu no reforsu governasaun di'ak iha periodu 2020-2025.
Ministru Fidelis dehan, Konsellu Ministrus aprova ona, tuir projetu ne'ebe aprezenta husi Ministru Finansas, alterasaun daruak ba Akordu kontribuisaun finanseira ba objetivu dezenvolvimentu sustentável nian entre Repúblika Demokratika Timor-Leste no Estadus Unidus Amérika, liuhusi ajensia USAID, ne'ebé asina ona iha loron 18 fulan-maiu tinan 2021.
"Akordu ida-ne'e atu haree ba dezenvolvimentu setór naun petroliferu no reforsu governasaun di'ak ba periodu tinan 2020 to'o 2025," dehan Ministru Prizidensia Konsellu Ministru (MPKM) Fidelis Manuel Leite Magalhaes ba Jornalista hafoin remata reuniaun KM iha Palásiu Governu, Kuarta (10/05).
Nia tenik, Alterasaun ida-ne'e ho nia objetivu atu aumenta valór kontribuisaun finanseira, ne'ebé sei realiza husi Estadus Unidus Amérika, ho dolar amerikanu millaun 36,6 ba dolar amerikanu millaun 53,6. "Konsellu Ministru hili Ministru Finansas hodi reprezenta Governu Timor-Leste, atu asina akordu ida-ne'e," haktuir Ministru.
Alende ne'e konsellu ministrus mós aprova ona, tuir mós projetu ne'ebé aprezenta husi ministru finansas, alterasaun daualuk ba Akordu kontribuisaun finanseira ba objetivu dezenvolvimentu sustentável sira entre Republika Demokratika Timor-Leste no Estadus Unidus Amérika, liuhusi ajensia USAID, ne'ebé asina ona iha loron 27 fulan-marsu tinan 2014.
Ministrus dehan tan, Akordu ida-ne'e ho nia objetivu atu reforsa kapasidade institusional no umana ba dezenvolvimentu periodu tinan 2014 to'o 2019. "Alterasaun ida-ne'e ho nia objetivu atu revee data ikus akordu nian ba loron 30 fulan- setembru tinan 2025 hodi permite konkluzaun atividade sira ne'ebé finansia husi kontribuisaun finanseira," tenik nia. "Konsellu Ministrus hili Ministru Finansas hodi reprezenta Governu Timor-Leste atu asina akordu ida ne'e," Salienta nia. (BT)
