ILIOMAR----VIII Governu liu husi Ministru Administrasaun Estatal (MAE) Miguel Pereira de Carvalhu hala'o atividade inaugurasaun Uma Naroman ba Povu +A (UNP) unidade hamutuk 11 iha suku Fuat postu administrativu Iliomar munisípiu Lautém.

Tuir Administrador Munisípiu Lautém (AML) Domingos Sávio hatete, Populasaun barak husi suku Fuat barak mak mate iha tempu rezistensia tinan hirak liu ba. "Suku Fuat espesial iha Postu administrativu Iliomar, tanbá populasaun suku Fuat nia povu mate barak iha tempu rezistensia, tanbá rezistensia tinan 24 iha postu administrativu Iliomar hamutuk na'in 7, maibé maioria iha suku Fuat nian", hatete Administrador Munisípiu Lautém (AML) Domingos Sávio hafoin inaugura Uma Naroman ba Povu +A iha suku Fuat postu administrativu Iliomar munisípiu Lautém, Kuarta (03/05).

Nia hatutan, Suku Fuat hetan UNP hamutuk unidade-27, programa ida ne'e husi VIII governu konstituisional nian, lidera husi Primeiru Ministru Taur Matan Ruak, maske foin tinan 2 asume administrador Munisípiu Lautém, maibé sente kontenti no orgullu, tanbá servisu ho ema matenek ida, kria planu ne'ebe mak di'ak hahú husi baze hodi benefisiu direta ba ita nia komunidade sira.

“Imi mak terus ba rai ida ne'e, mate barak iha Ai laran, Suku Fuat mak foti Iliomar nia naran iha Munisípiu no Timor-Leste tomák, tambá valor Uma Naroman ba Povu ne'ebe kontrui lalais kualidade ne'e mak Uma Naroman ba Povu +A mai kona iha Postu Administrativu Iliomar.,’ katak nia.

Iha fatin hanesan, Ministru Administrasaun Estatal (MAE) Miguel Pereira de Carvalhu hato'o parabéns ba komunidade Postu Administrativu Iliomar espesial ba komunidade suku Fuat, tanbá komunidade iha postu administrativu Iliomar badinas tebés, badinas tanba servisu ba nia povu sira, badinas ba dezenvolvimentu iha suku no postu administrativu, tamba servisu lalais implementa ho didi'ak mak iha postu administrativu Iliomar suku Fuat, nune'e tinan ida ne'e seí fo tan UNP iha suku Fuat.

Governante ne'e akresenta, ohin mai inaugura UNP +A hamutuk unidade 11, suku ida ne'ebe mak servisu di'ak no kualidade sei hetan premiu, tambá iha VIII governu konstituisional ne'ebe mak lideradu husi Primeiru Ministru Taur Matan Ruak, intervensaun ba dezenvolvimentu sira, nia alvu prinsipal mak ema.

Nia argumenta, Orsamentu ne'ebe mak konstrui UNP ne'e mai husi Orsamentu Jeral Estadu, mai husi mina Timor no inpostu sira, nune'e uza fila-fali hodi halo dezenvolvimentu ba komunidade sira, durante tinan 3 kompostu tinan 2021, 2022 no 2023 VIII governu konstituisional konstrui UNP hamutuk unidade 9854 iha teritoriu Timor laran tomak.

Partisipasaun ba serimonia inaugurasaun Uma Naroman ba Povu +A ne'e husi Ministru Administrasaun Estatal (MAE) ho ekipa tomak, Administrador Munisípiu Lautém (AML), Administrador Postu Administrativu Lautém (APA) ho ekipa tomak, Deputadu V lejislatura Abilio Quintão, Xefi Suku Iliomar I, Reprezenta Xefi Suku Caenliu, Xefi Aldeia, Reprezenta CCLN Munisipiu Lautém, segundu Komandante PNTL Munisipiu Lautém, Komandante Eskuarda Postu Iliomar, Xefi Sentru Saúde Postu Iliomar, Veterano/a, suku Fuat no komunidade sira. (BT)