COVALIMA----Governu liuhusi Konsellu Nasional Seguransa Soberania Alimentar Nutrisional Timor-Leste (KONSSANTIL) uza orsamentu ho montante hamutuk rihun lima atus ida lima nulu ($5,150.00) iha Munisípiu Kovalima selebra loron ai-han mundial.

Tuir Diretór Agrikultura Munisipiu Kovalima Zeferino Guterres Amaral, iha diskursu hateten, objetivu husi komemorasaun loron Mundial ai-han ho tema "Hari'i Sistema Ai-han mais Rezilénte atu hetan Timor Leste Nutritívu, Saudável, no Seguru" hodi oinsa valoriza ema hotu nia esforsu no assegura ema nia direitu fundamental ba asessu ai-han no seguru tanba atu fo importánsia ba ai-han ne'ebe maka iha, duránte ne'e to'os na'in sira maioria halo to'os no natar maibe iha obstákulu atu halo prosesamentu ba ai-han ne'ebe iha atu sai kualidade.

“Objetivu husi komemorasaun ne'e oinsa fo importánsia hodi valoriza ba ita nia ai-han rasik no saida maka ita kuda, ne'ebe eventu ne'e importante ba ita nia Agrikultor sira iha baze, dala barak Agrikultor sira halo to'os ho natar maibe iha obstakulu boot ida maka prosesamentu ai-han ne'ebe iha atu sai kualidade diak,” Hateten Diretór Agrikultura Munisipiu Kovalima, Zeferino Guterres Amaral liuhusi diskursu hafoin partisipa iha selebrasaun loron ai-han mundial ne’ebe hala'o iha salaun Uma Feto Kovalima (Gedung Wanita) Kuarta (24/11).

Enkuantu Diretór Nasional Seguransa ba Ai-han, Rofino Soares Gusmão, hatutan, Iha Timor-Leste kazu mal nutrisaun sa'e maka'as ho pursentu 47, tanba ne'e husu ba partisipantes sira atu rona didiak esplikasaun ne'ebe maka Orador sira esplika hodi nune'e bele implementa iha moris loro-loron.

“Kazu mal nutrisaun dalaruma sa'e maka'as iha Suku no Postu ne'ebe iha area remotas, iha Timor Leste kazu mal-nutrisaun bo'ot tebes atinje pursentu 47, entaun iha selebrasaun ne'e laos ita mai tuur deit, maibe tenke rona esplikasaun sira ne'e atu nune'e fila ba uma tenke implementa tuir nesesidade loro-loron nian,” Esplika Diretór Nasional Seguransa ba Ai-han liuhusi Diskursu.

Enkuantu, Sekretáriu Administrasaun Munisipiu Kovalima, Francisco Alves, promete sei apoiu Servisu Agrikultór sira iha Covalima atu nune'e bele hasa'e produsaun ai-han ho diak liu tan. “Ita sei apoio ita nia Servisu Agrikultor sira iha Covalima atu sira servisu maka'as liu tan hodi hasa'e Produsaun ai-han, tanba ita seidauk utiliza ai-han sira ne'e ho di'ak, tanba ne'e maka presiza halo diversifikasaun ba Ai-han sira ne'e labele hein han de'it,” Deklara nia.

Entretantu iha komemorasaun loron ai-han mundial ne'e realiza hetan partisipa husi Komandante PNTL Covalima, ONG lokal no Nasional iha Covalima, xefe Suku sira no Diretór liña sektorais, inklui Estudante Ensinu sekundáriu sira tanba iha komemorasaun ne'e, aktividades tolu maka implementa, hanesan Semináriu, Espozisaun ba produtu Lokál no kompetisaun kulinária.

Enkuantu total orsamentu ba Komemorasaun loron ai-han Mundial ne'e hamutuk $5.150.00, no orsamentu hirak ne'e hetan apoio husi Diresaun Nasional Seguransa Ai-han no Servisu Munisipál Agrikultura Munisipiu Covalima. (BT)