DÍLI----União Europeia (EU) Procultura PALOP-TL sei finansia projetu Kultura Gastronómika Ansestral no Agrikultura Timoroan iha tinan 2022 nia laran, ho montante €20.000 (U$D 21.800), ne’ebé relasiona ho identidade kulturál gastronómiku timoroan ne’ebé aprezenta husi Fundação Centro Quesadhip Ruak.

“Ohin ita partisipa iha serimonia asina kontratu ba projetu ne’ebé hetan apoiu husi União Europeia (EU) liu husi Embaixada Portugal kona ba formasaun, formadores iha área agrikultura nomos kuziñeira atu hala’o programa te’in hahan tradisional nomos agrikultura,” Hateten Primeira Dama Timor-Leste, Isabel da Costa Ferreira, ba Jornalista sira hafoin partisipa iha asina kontratu iha Sentru Kultura Embaixada Portugal Dili, Kuarta (24/11)

Nia Hatutan, Uma sidadania sira husi Fundasaun sei iha papél fundamentál iha projetu ne’e, ne’ebé interliga patrimóniu kulturál gastronómiku, edukasaun alimentar, nutrisionál no agrikultura sustentavél iha Timor-Leste. “Projetu ne’e asina kontratu ohin maibé sei implmenta iha tinan oin, hahu iha fulan Fevereiru tinan 2022, durante tinan ida no total orsamentu husi projeitu ida ne’e ho montante €20.000,” Dehan nia

Nia dehan, Programa ne’e sei lori benefisiu ba joven sira tanba sei iha formasaun ba joven hamutuk 25 ba área ne’ebé Timor presiza, iha área agrikultura no área kulinária hodi promove hahan tradisionál, ida ne’e primeira vez maka Fundasaun halo, no ami espera katak ho projetu ida ne’e ita hahu husi buat ki’ik maibé ita ambisiozu loos hakarak multiplika.

Nia akresenta, Sidadaun ne’ebé partisipa ba formasaun ida ne’e sei mai husi Munisipiu sira, kuziñeira presiza ema na’in 20 no agrikultura na’in 5, total hamutuk 25 no ita hakarak Munisipiu ida feto ida no mane ida. Formador sei mai husi malae portugés ida, Fenrnando Madeira mak sei fó formasaun ba joven sira,.

Iha sorin seluk, Embaixador Portugal iha Dili, José Pedro Machado Vieira, hatutan, Projetu ne’e nia objetivu atu haforsa sidadania ativa no identidade ho valor sosiál sira, liu husi valorizasaun husi patrimóniu kulturál imateriál gastronómiku no ninia relasaun ho asaun sosiál no edukasaun.

Entretantu, Embaixadór União Europeia (EU) nian iha Timor-Leste, Andrew Jacobs, hatete, União Europeia fiar katak kultura iha poder atu hari ponte sira entre ema sira, nomeadamente foin sa’e sira, kultura haforsa entendimentu ba malu, nia serve hanesan motor kresimentu sosiál liu husi kriasaun kampu traballu ne’ebé adekuadu, ho ida ne’e maka ami dezenvolve programa balun hodi apoiu área kultura ne’ebé prokultura sai kontribuisaun konkreta ba realizasaun husi vizaun ne’e.

“Iha ambitu asaun Prokultura PALOP-TL nian ida ne’e, hili ona projetu neen iha Timor-Leste, ho montante besik €62.000 (USD 67.580), iha área oi-oin setór kulturál nian, hanesan gastronómia literature labarik foinsa’e nian, artezenatu, multimedia no edukasaun artístika,” dehan Embaixadór União Europeia (EU), Andrew Jacobs.

Nia afirma, Kona ba xamada diversidade tuir mai iha Timor-Leste, sei hala’o hahu husi fulan janeiru to’o fulan Marsu tinan 2022 ho objetivu atu finansia projetu ka asaun sira to’o 10.000€ (USD 10.900), ne’ebé uza kriatividade, patrimóniu, koñesimentu kulturál no propriedade intelektual nu’udar rekursu atu produs bem no serbisu sira ho valor ekonómiku akresentadu, sein haluha komponente sosiál no kulturál sira.

Portantu, Instrumentu finansiamentu nian ba diversidade kulturál, sidadania no identidade, ne’ebé jere husi Camões-Centro Cultural Português ho parseira ho EUNIC-Rede Institutos Culturais e Embaixada União Europeia no enkuadra iha atividade sira, ne’ebé promove husi procultura –promoção do emprego em atividade geradoras de rendimento no setor cultura, nos PALOP e em Timor-Leste.

Procultura PALOP-TL maka asaun programa indikativu multianual PALOP-Timot-Leste no União Europeia, ne’ebé finansia husi União Europeia, konfinansia no jere husi Camões, I.P. no konfinansia husi Fundação Calouste Gulbenkian. Nia iha objetivu atu kontribui ba kriasaun empregu iha atividade sira ne’eb’e kria rendimentu iha ekonómia, kulturál no kriativa iha PALOP no iha Timor-Leste.

Asinatura kontratu ne’e, hala’o iha Sentru Kulturál Portugés Embaixada Portugal iha Dili, ne’ebé asina kontratu husi Embaixadór Portugal iha Dili, José Pedro Machado Vieira no Prezidente Interino Konsellu Administrasaun, Fundação Centro Quesadhip Ruak, Leonildo Tomas da Costa. No akompaña husi, Primeira Dama Timor-Leste, Isabel da Costa Ferreira no Embaixadór União Europeia (EU) nian iha Timor-Leste, Andrew Jacobs. (BT)