SUAI----Hafoin Comisaun Nasional das Eleisoens (CNE) hala'o edukasaun Sivika ho tema Promove Esklaresimentu kona ba aktu eleitoral no eleisaun ne'ebe rezilente ho Covid-19, Diretór Estabelesimentu prizaun suai relata dadur prizioneiru hamutuk ema na’in-15 iha prizaun Suai sei dauk iha kartaun eleitoral.

Tuir Diretór Estabelesimentu prizaun suai Julio Dias Ximenes, Informa, Festa Demokrasia sei monu iha tinan 2022 nomos 2023, no sidadaun hotu iha direitu atu ezerse sira-nia direitu iha eleisaun maibe dadaun dadur Prizioneiru na’in-15 seidauk iha kartaun eleitoral.

“Sidadaun hotu iha direitu atu ezerse sira nia direitu iha eleisaun prezidensia ne'ebe sei akontese iha tinan 2022 no eleisaun parlamentar iha tinan 2023, tanba ne'e iha oportunidade ida ne’e hau hakarak rekomenda ba Comisaun Nasional Eleisaun (CNE) tanba depois hau rekolla informasaun ba maluk dadur sira hela hamutuk ho hau iha fatin ida ne'e sira balu mak sei dauk iha kartau eleitoral hamutuk ema na’in 15,” Hateten Xefe Estabelesimentu Prizaun Suai, Julio Dias Ximenes, iha-nia intervensaun hafoin, Tersa (23/11).

Alende, Prisioneiro na’in-15 laiha kartaun eleitoral, iha prinsioneiro na’in-11 mak oras ne'e daudaun sira nia kartaun eleitoral mak lakon ona tanba ne'e husu Sekretariado Tekniku Administrasaun Eleitoral (STAE) no Comisaun Nasional Eleisaun (CNE) atu bele fasilita prisioneiro sira hodi bele hetan kartaun eleitoral iha tempu badak.

Nia dehan, Ho kestaun refere nia parte prepara ona karta ida hodi haruka ba iha STAE no CNE atu bele mai iha prizaun hodi halo kartaun eleitoral ba prisioneiro sira ne'ebe sei dauk iha kartaun eleitoral no sira ne'ebe kartaun lakon ona.

Nia haktuir, Edukasaun sivika ne'ebe hala'o husi CNE ba prisioneiru sira iha prizaun Suai ne’e importante tebes tanba nudar sidadaun ida direitu atu bele hili ka fo votus ida ba ninia kandidatu ida ka ba partidu ida bainhira eleisaun mosu liliu ba iha eleisaun presidensial sei akontese iha tinan 2022 no eleisaun parlamentar iha tinan 2023.

Entretantu, Diretor Estabelesementu Prizaun Suai ne’e mos aprezenta katak agora daudaun total okupantes ka prizioneiru iha prizaun Suai hamutuk ema na’in-110, husi numeru ida ne'e prisioneiru kondenadu hamutuk em na’in 71, prizaun preventiva hamutuk ema na’in-39.

Nia haktuir, Prizioneiru na’in-110 ne'e kompostu munisipiu 4 tanba prizaun ne'e atu responde ba area juridisaun Tribunal Suai. “Agora sira husi ne'e ita-nia okupante sira ne'e husi munisipiu 4, tanba prizaun ne'e atu responde ba juridisaun Tribunal Suai simu ita-nia maun-alin sira komete iha konflitu ho lei mak hanesan husi Munisipiu Covalima, Bobonaro, Ainaro no Manufahi,” Deklara nia.

Nia Relata, Prizioneiru iha prizaun Suai husi Covalima oan rasik hamutuk ema na’in-35, prizioneiru hosi Ainaro ema na’in-26, husi Bobonaro ema na’in-27 no Manufahi ema na’in-22, inklui Guarda Prizaun Suai hamutuk ema na’in-39 kompostu hosi feto 4 mane 35. Enkuantu husi prisioneiru na’in-110 fahe ba bloku hanesan bloku A ema na’in-37, bloku B ema na’in-30, bloku C ema na’in-30 no sira iha kozinha hamutuk ema na’in-13. (BT)