DÍLI----Fundus Nasoins Unidas ba Labarik (UNICEF Sigla Inglés), ho Embaixada Portugal Camões, I.P, Ministeriu Saude (MS) asina Memorandu Of Undesrtanding (MoU) ba apoiu ne’ebe mak responde ba Covid-19 iha Timor-Leste.

“Objektivu husi asina memorandu ida ne’e atu haree liu ba orsamentu ne’ebé sira apoiu ba Ministériu Saúde liu husi koperasaun ho UNICEF, orsamentu ne’ebé sira apoiu maka $125 mil dolar, fazeadamente sasan sira ne’e ita simu hotu ona no aloka ona ba Munisípiu sira,” Hateten Minstra Saúde (MS), Odete Maria Freitas Belo, ba Jornalista sira iha Palacio de Cinzas Caicoli Dili, Kinta (28/10)

Nia hatutan, Asina Memorandu Intendimentu ne’e, UNICEF no embaixada Portugal sei oferese Oxijeniu konsentrador 40 ba tratamentu kazu todan Covid-19 baxa iha sentru izolamentu sira, no maka 4.000 liu, luvas 12.000 no desinfetante ba seguransa profesional saúde sira mak trata pasiente sira ho Covid-19 ka fornese serbisu saúde esensial sira.

“Oxijeniu ne’e esensial atu salva moris durante pandemia Covid-19, no fornesimentu oxijeniu konsentrador sira no suprimentu medikal sira seluk sei apoia Ministíriu Saúde hodi halo tratamentu ba sira ne’ebé moras todan no kontinuasaun serbisu saúde esensial sira” Dehan Odete.

Governante ne’e afirma, Serimonia asinatura ne’e hahu moos ho espozisaun husi UNICEF ho Portugal nia apoiu atu responde ba Covid-19 nasional no apoiu ba tempu naruk. Espozisaun ne’e, inklui komponente apoiu husi Komite Nasionál UNICEF iha Portugal foka ba melloramentu asesu ba bee, saneamentu no ijiene iha eskola sira.

“Ita agradese ba parseiru sira hotu, bainhira sira hatene katak Timor-Leste afetadu Covid-19 sira apoiu ita. Atualmente iha fulan jullu ita hetan apoiu husi Portugal ba ekipamentu sira hodi halo prevensaun ba Covid-19 inklui mos vasina,” Salienta nia.

Iha sorin seluk, Embaizadór Portugal, José Pedro Machado Vieira, hatete, Maske setor saúde la’os sentral iha portofoliu koperasaun portugueza, fortemente ankoradu iha setor edukasaun, hahu inisiu kedas husi pandemia, ho atentu no besik ba kontestu nasionál no nia dezenvolvimentu, Portugal buka atu kopera ho autoridade Timor-Leste hodi luta hasoru saúde no efeitu sosiu ekonómiku sira husi Covid-19.

Entretantu, reprezentante país UNICEF iha Timor-Leste, Bilal Zeb Durrani, sente kontente no agradese ba Governu no povu Portugal ba sira nia apoiu liu husi embaixada no mos liu husi Komite Nasionál mak lori mudansa lolos ba labarik sira ho familia tomak iha Timor-Leste.

“Ami kontente loos ho ami nia parseiru ho Ministériu Saúde no Embaixada Portugal hodi habelar ami nia resposta ba Covid-19, UNICEF nia objetivu atu apoiu Governu hodi fornese ba labarik no sira nia familia tomak hodi asesu ba kuidadu saúde, edukasaun no protesaun, parseira sira ne’e, ajuda ami fornese asistensia nesesaria,” dehan, Bilal Zeb Durrani.

MoU ne’e asina ona husi Embaixada Portugal, José Pedro Machado Vieira, Ministra Saúde, Odete Maria Freitas Belo no reprezentante país UNICEF iha Timor-Leste, Bilal Zeb Durrani. Serimonia asina MoU ne’e hala’o iha Ministériu Saúde, Palacio des Ciszas,Caicoli Dili. (BT)