DÍLI----Vise Primeiru Ministra no Ministra Solidariedade Sosial no Inkluzaun (MSSI) Armada Berta Dos Santos, Hatete, Ohin loron importante MSSI bele entrega ekipamentus liliu motorizada-65, inklui ekipamentu informatika no mobiliariu ba tekniku sosial iha postu administrative-65 husi Munisipiu 12 maibe la inklui Rejiaun Administrativa Espesial Oecusse Ambeno (RAOEA).

“Ha’u senti ohin loron ida ne’ebé importante para atu bele entrega hamutuk iha MSSI ho ekipamentus ne’ebé mak iha liliu ba motorizada ne’ebé mak durante ne’e balun keta uza motor privadu karik, maibé dadaun ne’e ministeriu prepara para atu bele halo servisu diak liu tan iha munisipiu liliu iha postu administrativu sira, Ha’u fiar katak ho servisu professional se bele melora diak liu tan atendimentu iha baze ho diak liu, tanba ida ne’e mak ohin ita halo hand-over ba iha patrimoniu ba iha ekipamentus sira ne’e liliu ba motorizada, komputadores, kadeira no meza sira par bele utiliza iha postu administrative-65 no ida ne’e la inklui RAEOA,” Hateten Vise Primeiru Ministro No Ministra Solidariedade Sosial No Inkluzaun (MSSI) Armanda Berta dos Santos, liu husi nia diskursu iha Edifisiu MSSI Kaikoli Díli, Kuarta (20/10).

Nia hatutan, Sasan sira ne’e iha tinan 2021 ita-nia orsamentu jeral estadu liga ho kapital menor ne’ebé mak ita preve osan ba iha motorizada-65 nomos ekipamentus informatika no mobiliariu ne’e ba postu administrativu 65.

“Entaun ho ida ne’e ha’u fiar katak buat sira ne’e hotu patrimoniu estadu ita tenki uza tuir servisu estadu ninian hodi halao servisu no ha’u fiar katak iha tinan 2022 ita sei iha programa bolsa da mae projetu pilotu bolsa da mae ninia para atu bele hare hamutuk foci dadus presiza transporte ida ne’ebé ita bot sira hodi lao ba mai atu hare servisu sira ne’e hotu. Entaun ho ida ne’e mak ita prepara ekipamentus sira ne’e ba imi para atu bele uza ho diak tuir servisu estadu nian ne’ebé durante ne’e sira halo,” dehan nia.

Iha sorin seluk, Diretor Nasionál Jestaun Finansa no Patrimonial MSSI, Jimmi Valente de Orlean dos Reis, Hatutan, Motorizada ne’ebé fo ba tekniku sosiál sira iha postu administrativu, iha munsipiu sira, fahe ba kategoria rua mak hanesan Honda 160 cc hamutuk-41 no Honda Supra 120 cc iha-24, nune’e hamtuk-65. “Ekipamentu sira ne’ebé distribui hanesan Komputador, printer, Uninterruptible power Supply (UPS) enerjia hamutuk-65,” Haktuir nia.

Nia Afirma tan, Orsamentu ne’ebé utiliza sosa sasan sira ba motor $110.255, ekipamentu informatika $161.270, meza no kadeira sira hamutuk $36.625, ne’ebé total hamutuk $308.120 ne’ebe mak liuhusi prosesu protokolu.

Nia Haktuir, ba oin MSSI sei koordena oinsa bele kanaliza sasan ba Oecusse, tanba ita hatene sasan atu ba iha ne’ebé tenke hetan autorizasaun husi autoridade rasik tanba ne’e ita sei estabeles akordu ida hafoin haruka ba. “Husu ba postu administrativu ne’ebé ohin simu uluk ona motorizada inklui ekipamentu, tenki uza ho diak no kuidadu iha terenu tanba antes ne’e iha tinan 2008 MSSI fahe ona ba tekniku sosial sira iha postu administrative,” Informa nia.

Entretantu, Benefisiariub, Gergio da Silva, nu’udar tekniku sosial iha postu administrativu Laclubar, munisipiu Manatutu, agradese ba governu liu husi MSSI ne’ebé entrega fasilidade no ekipamentus informatika nomos mobiliariu. “Ha’u agradese ba MSSI tanba bele apoiu ona ami ho fasilidade sira ne’e, tanba ne’e bele fasilita ami halo servisu atendimentu ba komunidade iha baze, tanba bainhira la iha transporte bele difikulta ami-nia servisu,” Salienta nia. (BT)