DÍLI----Presidente Asosiasaun Enjenária Petróleo Timor-Leste (AEP-TL), Noventino Fernandes, Hatete, Perfurasaun mina iha suai ba servisu non-tekniku tenke envolve direita Timoroan sira liu-liu komunidade afetadu iha fatin refere nune’e labele mosu konfuzasaun ba sira tanba klaru katak servisu perfurasaun mina presiza ema tekniku tebes maibe parte ba non-tekniku presiza envolve direita Timoroan sira.

“Bazeia ba informasaun ne’ebé mak iha, hanesan joven lubuk ida ne’ebé mak ladun satisfas ho aktividade perfurasaun ida ne’e tanba la envolve direita iha aktividade ne’e rasik, lolos aktividade perfurasaun ne’e tenke aplika buat rua, tekniku no la’os tekniku. Agora tekniku ita hare envolve ema ne’ebé mak espesialista ba aktividade perfurasaun ne’e rasik, envolve direita ba aktividade perfurasaun ne’e mos laos ema hotu-hotu mai husi rai liur deit maibe presiza mos ema Timoroan sira hodi akompaiña par bele prepara rekursu tanba nasaun Timor Leste mos kuinesidu iha mundu katak iha riku soin mina naton,” Hateten Presidente Asosiasaun Enjenária Petróleo Timor-Leste (AEP-TL) ba jornalista BT, iha kna’ar fatin Taibesi, Sexta (15/10).

Nia hatutan, Se Timoroan sidauk iha rekursu ida ne’ebé preparadu entaun husi aktividade ne’e rasik espesialista ba perfurasaun ne’e bele husi ema rai liur maibé kada espesialista ne’e tenke akompana ho ema Timoroan minimu nain rua akompana espesialista ida, ne’e katak atu bele fo hanoin ona para aktividade ne’e remata mos iha ona esperiensia. “Bele envolve husi Universidade sira ne’ebé mak iha area petroleum ba ema espesialista sira nia okos atu hetan esperiensai, nune’e perfurasaun labele husi rai liur deit,” Salienta nia.

Nia dehan, Servisu perfurasaun Mina kolia kona ba non teknik ne’e bele envolve direita suku no aldeia sira nia oan rasik, serbisu non tekniku presiza saida mak atu halo, hanesan kondutor, Cleaner, seguransa no mandor sira. “Aktividade seluk ne’ebé ema tekniku halo la’os ema tekniku entaun sira presiza formasaun ba komunidade sira, nune’e bele fo benefisiu ba sira tanba Ita-nia hakarak aktvidade hotu ne’ebé mak realiza iha ne’e, ikus mai fo benefisiu ba povu ida ne’e no sosiedade sira ne’ebé afeitadu bele hetan haksolok,” Esplika nia.

Nia relata tan, Agora daudaun halo hela perfurasaun ba posu ida, ita espera katak ba oin sei halo perfurasaun ba posu rua. Saida mak ita hakarak rekomenda para ba oin bele hahu enkaisa Timoroan rasik husi suku no aldeia ne’e. Nia akresenta, Bainhira la envolve ema tekniku, petrolista husi Timoroan iha aktividade perfurasaun, ita sei nafatin hamrik hodi koallia nafatin atu ba oin tenke envolve ona ema Timoroan iha aktividade perfurasaun ne’e rasik, nune’e Timoroan labele sai bainaka iha ninia rai rasik.

“Ita halo aktividade para fo benefisiu ba timoroan la’os atu fo benefisiu ba ema seluk no ita lakoi atu hamate fali timoroan sira nia bontade, hanesan sosiedade sivil ita hamrik nafatin hodi defende timoroan sira nia preokupasaun tanba dalan diak para labele halo komunidade konfuzaun entaun tenke envolve sira iha perfurasaun ne’e rasik hodi hamenus problema iha fatin refere no bele fo klarifisaun ba komunidade ho diak, halo komunikasaun diak ho auttoridade ho kompañia hodi fo benefisiu ba Timor-Leste, liu-liu iha fatin ne’e rasik,” Tenik nia.

Nia Afirma, AEP-TL sidauk iha dadus ba Timoroan nain hira mak envolve iha aktividade perfurasaun mina iha suai maibe ita kolabra ona ho ema balun no ita komunika hela ho FONGTIL oinsa mak bele la’o no ami sidauk iha dadus serteza ida katak Timoroan nain hira mak envolve iha perfurasaun mina ne’e, ami kontinua esforsu atu buka dadus sira ne’e.

Nia haktuir, Asosiasaun Enjenária Petroleo Timor-Leste (AEP-TL) agradese ba esforsu VIII Governu Konstituisional ne’ebé mak lidera husi Primeiru Ministru, Taur Matan Ruak ne’ebé liu husi Ministériu Petroleum Minerais hamutuk ho Ministeriu relevante sira bele realize aktividade perfurasaun ida ne’e ba dahuluk.

“Perfurasaun ne’e istóriu foun ida ne’ebé mak ita halo iha Timor-Leste, depois de ukun rasik a’an foin pela priveira ves halo perfurasaun ida ne’e iha Timor liu-liu iha rai maran. Husi aktividade ida ne’e husi Asosiasaun Enjenaria Petroleo Timor-Leste fó apresiasaun no agradesemintu ba Governo maibe ita hakarak husu atu bele involve direita Timoroan sira liliu komunidade afeita sira tenke involve sira,” Informa nia.(BT)