DÍLI----Ministra Saúde (MS) Odete Maria Freitas Belo, Hatete, Fundus Nasoins Unidas ba Labarik (UNICEF sigla Inglés), ohin loron ofisialmente entrega frigorifiku ultra-malirin haat hodi armazena vasina Covid-19 ba Ministeriu Saúde oinsa armazenamentu SAMES.

”Ohin loron ofisialmente UNICEF apoia entrega frigorifiku ultra-malirin haat hodi armazena vasina Covid-19 ba Ministeriu Saúde nia fasilidade armazenamentu SAMES. Ne’e bele permite SAMES armazena vasina Pfizer BionTech mak presiza armazenamentu ho temperatura ultra malirin, antinji grau selsiu negativu 86 ona Ministeriu Saúde ho SAMES ba nia instalasaun, manutensaun no atualiza sistema armazenamentu korenti malirin no sistema distribuisaun tinan barak ona, ne’ebe ajuda ita armazena no distribui vasina Covid-19 rutina la ho interupsaun,” Hateten Ministra Saude (MS), Odete Maria Freitas Belo, liuhusi ninia diskursu iha Sames Kampu Alor Díli, Segunda (18/10).

Nia hatutan, Frigorifiku temperatura ultra-malirin negosia ona, sosa ona no entrega ona husi UNICEF ho fundus husi COVAX Facility, Vasina Pfizer BionTech doze 100,620 lote dahuluk to’o ona iha país iha loron 16 Outubru. Grupu Konsultativu Tekniku Nasional ba Imunizasaun no Ministeriu saúde aprova ona vasinasaun ba labarik sira tinan entre 12 no 18 mai kraik ho vasina Pfizer Biontech.

Nia dehan, Frigorifiku sira sei ajuda ita armazena ho seguru vasina Pfizer BionTch sira ho temperatura lolos, no permite ita atu implementa kampaña vasinasaun ba labarik sira tinan 12 to’o 18 mai kraik, ne’e primeira vez Timor-Leste iha kapasidade hodi armazena vasina ho temperatura ultra-malirin.

Hahú to’o mai kedas iha país iha loron 22 fulan Setembru, UNICEF servisu hamutuk ho Ministeriu Saúde, SAMES no fabrika atu garante katak país ne’e prontu hodi simu vasina Pfizer BionTech. UNICEF apoia ona SAMES hodi instala no monitoriza nia temperatura loron ida dala-tolu hodi haree nia funsionamentu, no apoia formasaun SAMES nia tekniku sira, Tekniku Ekipamentu Biomedikal sira, no staff ba operasaun, monitoriza no manutensaun sistema.

“Armazena no transporta vasina sira ho temperatura lolos mak fundamental atu salva labarik no adultu sira husi moras potensialmente fatal. UNICEF orgullu hodi apoia Timor-Leste tinan hirak ne’e, liu husi instalasaun sistema korenti-malirin iha país ne’e ba imunizasaun rutina no mós ba vasinasaun Covid-19. Ita eleva ona kapasidade korenti-malirin iha país ne’e ba nivel aas ho instalasaun sistema korenti ultra-malirin ba primeira vez,” dehan Reprezentativu UNICEF Bilal Durrani.

Nia informa, Hahú husi SAMES, ita sei habelar gradualmente sistema korenti-malirin ba parte sira seluk iha país ne’e. “UNICEF mós sei hola tan frigorifiku temperatura ultra-malirin adisional 16 ba Ministeriu Saúde, ho fundus husi Governu Australia. Frigorifiku sira ne’e sei instala iha armazen rejional sira, atu permite governu armazena vasina sira mak presiza temperatura ultra-malirin besik ba ospital rejional sira no sentru saúde munisipal sira, no reduz tempu no kustu transportasaun vasina sira husi Dili ba sentru saúde sira,” Afirma nia. (BT)