OGUES----Centru Juventude Covalima iha loron Sexta (15/10) feira distribui sertifikadu ba joventude hamutuk na’in-14 iha Suku Ogues, Postu Administrativu Maucatar, Munisipiu Covalima.

Tuir Fasilitador CJC, Mateus Goncalves, Hatete, Sertifikadu ne'ebe fahe ona ba formandu ka joven sira ne'e haree hosi sira nia kapasidade kona ba area formasaun ne'ebe sira tuir durante loron lima nian laran. “Sertifikadu ne'ebe ami fahe ida mak ami haree hosi sira nia kapasidade, kona ba sira nia area tanba formasaun durante loron lima, sertifikadu mos ho nia objetivu atu sai hanesan referensia ida ba sira durante formasaun lao to'o remata ohin,” Hateten Fasilitador CJC Mateus Goncalves ba jornalista sira hafoin remata entrega sertifikadu ba joven sira iha Sede Suku Ogues, Sexta (15/10).

Nia hatutan, Joven hirak ne'e simu sertifika hafoin tuir formasaun kana ba Life Skill Based on Education (LSBE) ka ho lian tetum Edukasaun Bazeia ba Abilidade Moris durante loron lima nia laran ne'ebe fasilita hosi Centru Juventude Covalima hala'o iha Sede Suku Ogues, Postu Maucatar.

Nune’e, Fasilitador ne'e mos husu ba joven sira ne'ebe simu ona sertifikadu labele baruk maibe tenke kontinua aprende iha area ne'ebe deit bainhira iha ema ruma ka organizasaun hakarak atu mai fasilita informasaun ba foin sae sira iha munisipiu ida ne'e. “Nudar joven labele baruk buka ba parende nafatin tanba joventude mak sai autor ou sai ai rin ba foin sae sira no sai mata dalan ba iha komunidade nia let,” Esplika nia.

Iha Sorin seluk, reprezenta participantes, Abelina Sandre Silva Barros, sente kontente tanba loron lima nia laran tuir formasaun kona ba edukasaun bazeia ba abilidade moris lorloron nian ne'ebe fasilita hosi Centru Juventude Covalima. “Hau sente kontente tebes tanba tuir formasaun durante loron lima iha ne'e, halo hau bele iha konesimentu klean liu tan edukasaun bazeia ba abilidade moris no mos bele hetan informasaun barak no bele aumentu konesimentu no esperiensia,” Haktuir participantes, Abelina Sandre Silva Barros.

Nia dehan, Durante formasaun ne’e iha komitementu hakarak atu aprende klean liu tan karik iha futuru oin mai sei iha formasaun ka treinamentu hakarak atu involve an nafatin. (BT)