KAMANASA----Joventude iha Suku Kamanasa, Munisipiu Covalima, lasatisfas ho Operador Timor Recources ne'ebe hala’o perfurasaun mina iha Kamana-Suai hatama ema servisu Kondutór ho Cleaner husi Munisipiu seluk.

Tuir Reprezentante Joventude Kamanasa, Apolinario Amaral, Hatete, Prokupasaun boot liu ba joventude iha suku Kamanasa mak ne'e tanba saida mak serbisu Timor Recources ne'e hanesan kondutór no Cleaner sira tenke mai hosi fatin seluk maibe ema iha suku ida ne'e joven bele lori karreta no servisu cleaner sira iha hotu maibe lainklina aan.

“Perfurasaun mina agora daudaun monu iha Aldeia Sanfuk, Suku Kamanasa, maibe preokupasaun ba ami liliu ba joventude mak ne'e tanba saida mak serbisu Timor Recources ne'e kondutór ho Cleaner ema mai hosi fatin seluk, tanba ami haree iha suku Kamanasa liga liu ba joventude iha ne'e mos kondutóres lubuk ida, ema kliner mos hau sente iha, tanba ita hotu hatene katak parte perfurasaun kona ba teknika mai hotu husi Indonezia, Maibe tanba saida mak kona ba buat hirak ne'e tenke ema mai hosi fatin seluk,” Hateten reprezentante Joventude Kamanasa Apolinario Amaral ba jornalista sira hafoin partisipa iha serimonia ritual lia nain sira hosi Uma lisan Nikir Kalabuk uma lisan Alin Kau Koba no uma Amanas hisik postu mina matan Liu Rai iha iha Area Sanfuk, Segunda (11/10).

Nia hatutan, Hahu hosi inisiu mai ne'e koalia importansia liu joventude iha suku Kamanasa mas na realidade ikus mai joventude iha suku ida ne'e sai penonton projetu ne'ebe loke iha suku laran rasik. “Durante ami nia haree hosi primeiru mai ne'e sira koalia importansia liu ba joventude iha suku Kamanasa mas na realidade to'o ikus mai joven Kamanasa sai penonton ba projetu ne'ebe iha sira nia suku laran rasik, ida ne'e mak hau lori joven suku ida ne'e nian ladun satisfas,” Deklara nia.

Nia dehan, Atu hamenus problema iha suku ida ne'e, tan ne'e tenke tau importansia ba joven sira iha suku ida ne'e. “Hau lori joven suku ida ne'e ladun satisfas no joven barak mos ladun satisfas ita dehan atu hamenus problema joven sira iha suku ida ne'e entaun buat hirak hanesan ne'e twnke tau importansia ba joven sira iha suku ida ne'e, se ida ne'e la tau importansia problema ruma mosu atu fo kulpa ba se, atu fo sala ba joven ka atu fo sala ba se tanba nai ulun sira rasik mos la haree ba joven sira iha suku ida ne'e, tanba Nina ida ne'e rasik mos sei fura iha suku ida ne'e nia laran,” Relata nia.

Nia haktuir, Hanesan reprezentante Joventude Kamanasa husu ba ukun nain sira karik bele haree liu ba joventude sira iha Suku Kamanasa ida ne'e tanba mina ne'e rasik fura iha suku ida ne’e rasik lakoi joven sira iha suku ida ne'e sai vitima ba projetu ida ne'e tanba ne'e bele fo netik serbisu liliu iha Cleaner ka kondotór. “Joventude sira iha Suku Kamanasa mos hatene serbisu sira hanesan Kondutór ho Cleaner bele hela, tanba saida mak parte hosi Timor Recources foti fali maluk sira hosi fatin seluk bele mai serbisu hanesan Cleaner no kondutór iha ne’e,” Preokupa nia.

Entretantu antes ne'e, Administrador Munisipiu Kovalima, Francisco Andrade, afirma kona ba traballador atu involve iha projetu perfurasaun ida ne'e hanesan ema hotu hatene katak buat ida tekniku liu ne'ebe oras ne'e sei dauk koalia kona ba trabalador sira. “Kona ba trabalador hanesan imi hotu hatene katak buat ida iha ne'e tekniku liu, ne'ebe oras ne'e daudaun ita sei dauk koalia kona ba trabaldor, maibe ba oin depois de hotu sei iha tempu ba trabalador sora bele partisipa iha ne'e maibe tenke liu hosi treinamentu ida ne'ebe rigor tebes tanba buat hotu ne'ebe ohin ita tama ba haree ne'e buat tekniku tebes,” Haktuir Administrador Munisipiu Kovalima, Francisco Andrade.

Alende, Country Manager Timor Recources, Filomino Andrade, Haktuir tan katak, Oras ne'e daudaun ema ne'ebe serbisu iha kompañia operadór Timor Recources estranjeiru ema nain 76, total atu serbisu deit iha operasaun nia laran ne'e hamutuk ema 100 resin. “Oras ne’e dadaun ema servisu iha operdaot Timor Resouces husi estranjeiru mak barak liu, tanba iha ita-nia rain seidauk iha kapasidade, sei dauk iha esperiensia kona ba area tekniku nian, maibe sira laos hala'o deit atividades hirak ne'e, iha maluk sira balu mak to'o agora iha esperiensia iha tasi laran, sira balu iha ne'e hamutuk ho maluk sira iha ladun iha esperiensia ami fo treinamentu ne'e mak to'o agora prosesu ida hala'o hela” Afirma Country Manager Timor Recources, Filomino Andrade. (BT)