KOVALIMA----Ohin loron Sabadu (09/10) Lia na’in hosi Uma lisan tolu hanesan uma Haemolin Fatisin, uma Babulu Matai no Uma Sesu Rai Laduka Maneguim hala'o serimonia ritual hisik balada nia ran tuir lisan ba ekipamentus perfurasaun iha mina matan Feto Maus Suai, iha Munisipiu Covalima, molok entrega ba kompañia operadór Timor Recources hahu perfurasaun mina iha fulan ne'e nia laran.

Molok atu realiza serimonia ritual lia nain hosi fukun rua hanesan lia nain hosi Uma Boot Babulu Matai no Uma Boot Sesu Rai Laduka Maneguim ba konsentra hotu iha Uma lisan Haemolin hodi lao ain ba fatin perfurasaun mina hodi hala'o serimonia ritual tuir lisan.

Iha serimonia ritual ne'e lia nain sira oho fahi ida hodi nia ran hisik ba ekipamentu sira ne'ebe preparadu ona hosi kompania operador Timor Recources no husu matak malirin ba rai fukun sira hotu atu nune'e to'o perfurasaun ne'e hahu bele lao ho diak labele fo impaktu ba kampañia hala'o ninia serbisu fura mina iha tempu badak nia laran.

Tuir reprezenta Lia na’in Uma lisan tolu husi lia na’in Bei Rai Ulun, Anacleto Amaral, Informa Katak, Serimonia ritaual haree liu hosi fahi nia urat ne'ebe lia nain hosi fukun tolu haree fo sinal diak tanba molok atu haree manu kokorek.

“Husi urat fahi nian ne'ebe ami haree no molok atu hahu ami-nia serimónia ida ne'e atu lao ba iha fatin ne'eba sente diak tanba atu sai ba fatin ne'eba manu mos kokorek, bainhira manu kokorek hatudu sinal katak ida ne'e dalan luan ba ami no loke dalan ida ba mina atu halo perfurasaun,” Hateten lia na’in Bei Rai Ulun, Anacleto Amaral ba jornalista sira hafoin remata serimonia ritual ba hisik ekipamentu ba perfurasaun mina matan Feto Maus Suai, Sabadu (09/10).

Iha Sorin seluk, Bei Nai Katuas uma lisan Sesu Rai Laduka Maneguim, Francisco Babo, hatutan, Kona ba perfurasaun ida molok atu lao durante ne'e kompañia serbisu hamutuk ho katuas lia na’in sira liuliu hosi Fatisin, Maneguim no Matai.

“Hahu hanoin perfurasaun ida ne'e atu lao liuliu hosi kompañia serbisu hamutuk ho ami katuas adat sira liliu hosi adat sira iha Aldeia Fatisin, Maneguim no Suku Matai ne'ebe ami hotu fiar metin katak buat ne'e sei hetan rezultadu pozitivu duni,” Haktuir, Bei Nai Katuas uma lisan Sesu Rai Laduka Maneguim, Francisco Babo.

Nia dehan, Lia nain husi fukun tolu ne'e sei hamutuk nafatin hodi husu tulun ba nai kukun no helik hodi fo tulun ba mina matan Feto Maus ida ne'e.

Enkuantu, Prezidente Autoridade Nasional Petroleu no Minerais (ANPM), Florentino Soares Fereirra, Haktuir mos, Ohin ANPM hamutuk ho Kompañia Timor Resources hamutuk ho Lia na’in sira iha Suai halao serimonia ritual atu oinsa hisik ekipamentus ba perfurasaun Mina iha Feto Maus Suai tanba oras ne'e daudaun ekipamentu preparadu hotu ona.

Hanesan Timor oan iha dever atu bele hakruuk ho fo rekonesementu ba lulik no bei Ala sira tanba hatene katak iha hun no abut tan ne'e mak ohin hamutuk iha fatin ida ne'e hodi halo tuir tradisaun ritual kultura rai ida ne'e ninian.

“Ita hotu hatene katak ita sei halo perfurasaun postu Feto Maus iha Kovalima hanesan ita haree iha kotuk ne'e mak ekipamentu postu Feto Maus, hanesan Timor oan ita nia dever atu hakruuk fo rekonesementu ita nia lulik no bei Ala sira, ita hatene katak iha hun no abut tanba ida ne'e mak ita hamutuk iha fatin ida ne'e atu halo tuir ita nia tradisaun ritual kultura hanesan ema Timor hanesan rai ida ne'e ninia hun no abut ita halo tuir mai husu lisensa kbit no beran atu nune’e saida dwit ita atu buka bele hetan matak malirin bainhira serbisu lao,” Haktuir Prezidente Autoridade Nasional Petroleu no Minerais (ANPM), Florentino Soares Fereirra.

Nia dehan tan, Liu husi serimonia ritual ida ne'e ho objetivu husu lisensa kbit no beran hodi bele hetan matak malirin katak hosi postu Feto Maus ne'e bele kontribui buat ruma ba rai Kovalima nomos ba Timor-Leste atu liberta husi mukit. “Atividade sira ne'e halo hotu ona iha futuru haree katak iha semana ida ka rua tan sei deside tempu fiksu atu bele actualization perfurasaun,” Afirma Prezidente Autoridade Nasional Petroleu no Minerais (ANPM), Florentino Soares Fereirra.

Iha serimonia ritual ne'e hetan partisipasaun hosi Administrador Munisipiu Kovalima, adninistrador Postu Suai no Maukatar, Komandante PNTL Munisipiu, Veteranus, Prezidente ANPM, Timor Gap, lia nain hosi Uma lisan tolu hanesan Uma Haemolin, uma Sesu Rai Laduka no uma lisan Babulu inklui Komunidade sira. (BT)