ZUMALAI----Ministru Obras Publiku (MOP), Salvador Eugenio Soares dos Reis Pires, hafoin hala'o programa sosializasaun desiminasaun informasaun ba kampaiña vasinasaun kontra Covid-19 iha Suku Ucekai no Mape, Postu Administrativu Zumalai, Munisipiu Kovalima husu komunidade sira tenke simu vasina atu oinsa haforsa imunidade hodi bele prevene moras hada’et pandemia global iha Mundu.

“Hau hakarak hatete vasinasaun ne'e importante, tanba vasina ne'e atu hasae ita-nia imunidade, moras ida Covid-19 ne'e kauza saida mak halo moras maibe buat ne'e naran virus, virus ne'e laiha aimoruk so vasinasaun deit mak bele hasae ita-nia imunidade tan ne'e husu ba ita hotu tenke simu vasina bainhira ita nia mediku sira to'o iha nia fatin,” Hateten Ministru Obras Publiku (MOP), Salvador Eugenio Soares dos Reis Pires liuhusi diskursu iha programa sosializasaun desiminasaun informasaun ba kampaiña vasinasaun kontra Covid-19 iha Suku Ucekai, Kinta (07/10).

Nia hatutan, Moras ne'e afeita barak ba ema iha mundu to'o ohin loron afeta ona ema juta 230 sofre moras ida ne'e, ema mate hamutuk juta 4, 7 tanba ne'e husu atu komunidade tenke simu vasina no estadu ka governu lakohi povu mate ba moras Covid-19.

Nia dehan, Iha Timor-Leste hamutuk ema nain rihun 19 mak sofre ona moras ida ne'e, husi numeru ida hamate ona ema na’in-119 tanba Covid-19. Husi mate ema na’in-119 ne'e kuaze pursentu 93 liu, sira ida mate ne'e tanba sira vasina dala ida ou la simu vasina liu.

Iha Suku Mape mos Ministru Obras Publika husu komunidade hotu tenke simu vasina tanba Covid-19 ne'e ejiste, covid ne'e laos dehan kestaun politika ka politizasaun deit governu para atu kontinua ukun, maibe iha dadus ne'e hatudu katak mundu ohin loron hotu-hotu sofre. “Governu hala'o programa kampaiña vasinasaun tama sai suku iha teritoriu tomak para atu salva povu labele mate tanba moras ida ne'e,” Afima nia.

Iha sorin seluk, Administrador Postu Zumalai, Rui dos Santos, Haktuir, Covid-19 ne'e laos akontese deit iha Timor-Leste maibe akontese iha mundu tomak hodi hamate ema barak liu tanba ne'e estadu ka governu Timor-Leste prevene buat sira ne'e hotu atu povu TL labele mate hanesan nasaun sira seluk.

“Governu iha planu tun ba iha suku hotu hodi hala'o kampaiña vasinasaun ba kontra Covid-19 hanesan ohin hala'o husi Ministru Obras Publika (MOP) mai iha suku Ucekaino sei kontinua ba fahe tutan informasaun refereba komu idade iha Suku Mape. Nune’e, ohin loron Ministru Obras Publika hakat mai to'o iha suku Ucekai tanba hadomi povu Ucekai atu labele mate ba moras Covid tan ne'e ohin mai hala'o kampaiña vasinasaun iha Ucekai,” Haktuir Administrador Postu Zumalai, Rui dos Santos.

Administrador husu husu komunidade labele rona lia votus sira ne'ebe ema koalia ne'e halo propaganda politik dehan simu vasina hotu mate ona maibe iha ne'ebe mak governu ne'e atu oho fali-nia povu. “Hakarak husu ba komunidade sira labele fiar liu ba lia votus sira nee'ebe mak ema koalia ne'e propaganda politik deit dehan ita sona lqkleur ita mate ona, mas iha ne'ebe mak governu ne'e atu oho fali nia povu, povu ne'e osan mean governu ukun karik ukun povu laos ukun fatuk ho ai,” Dehan nia. (BT)