DÍLI----Porta Voz Intelektual Kaisidu Oan, Martinho Da Costa Belo, Hatete, Relasiona ho kompañia Timor Sement ne’ebe mak dadaun investe iha Kaisidu Manatuto, komunidade sira iha kaisidu sei impede tanba kompañia refere lakoope ho Komunidade Kaisidu no la respeitu.

“Ami la konkorda kompañia Sement Timor atu halo investimentu iha area Kaisidu, tanba realidade, kompañia refere la respeita ita nia kultura no fatin ida ne’e hanesan fatin protejidu ba Uma Lisan hamutuk 38 nian,” Hateten Porta Vox Intelektual Kaisidu Oan Martinho Da Costa Belo hamutuk ho ekipa hafoin remata enkontru ho Primeiru Ministru (PM) ba Jornalista sira iha Residensia PM Farol, Sexta (08/10).

Nia hatutan, Komunidade Kaisidu la'os lakoi dezenvolvimentu iha ami nia rai, maibe ami koopera tebes, bainhira kompañia tama iha fátin ne'ebá, tenki respeitu ba fátin protejidu nune’e komunidade sira mos kontenti laos ba halo tuir komapañia nia hakarak deit.

“Ami mai hasoru malu ho Primeiru Ministru (PM) la'os atu bandu dezenvolvimentu, maibé ami hakarak tenki involve intelektual Kaisidu Oan, Kultura na'in ho komunidade sira hodi debate ida ne'ebé mak di'ak ho kualidade, atu determina fátin ne'ebé mak Governu no Estadu foti fatuk kolkaldu no fatuk ne'ebé mak labele tanba komunidade prontu fó fali rai Uaiono ba Governu no Estadu hodi fó ba kompañia atu harii fila-fali Turismu Kultural iha fátin ne'ebá,” Ralata nia.

Iha sorin seluk, Prezidenti Konsellu Veteranu Munisipiu Dili, Salostiano Dela Uru, Hakutir, Ami Kaisidu oan mai hasoru malu ho Primeiru Ministru (PM) Taur Matan Ruak, tanbá hetan obstákulu iha area ne'ebá, ami-nia hakarak oin ida no Estadu nia hakarak oin seluk, tanbá ida ne'e mak ami mai hasoru malu ho Primeiru Ministru (PM), hodi aprezenta ami-nia kestioens, ne'ebé mak akontese iha loron 15 Fulan Setembru 2018, Uma Lisan 38 ne'ebé mak iha Kaisidu.

“Ami husu karik realiza duni projeitu ida ne'e, Governu no Estadu Timor-Leste tenki husu legalidade Kompania nian, tanba Kompania hanesan investor ida, mai halo investe iha nasaun ida ne'e, ita nia Governu tenki hatama fali orsamentu Porsentu 64 Empreza mak Orsamentu porsentu 36,” Salienta nia.

Nia hatutan tan, Banhira empreza ida tama fatin ida, tenki respeita Fatin Kultura ne'ebe mak iha, Lei ne'ebe mak konsagra ona iha ita nia Konstituisaun Artigu 59 Alina 5, hateten katak, tenki respeita Kultura, maibe realidade Kompania ne'e tama fatin refere halo arbiru no ke'e rai arbiru, nunka fo liafuan ruma ba rai na'in sira.

Alende ne'e mos proposta ne'ebe mak Uma Lisan hamutuk 38 hodi mai entrega Primeiru Ministru (PM) la aseita mos Ponte-Kais labele tau iha ne'eba, tanba area refere ne'e area protejidu, tanba Uma Lisan 38 ne'e iha hotu diretu ba rai refere. Agora Governu no Estadu nia hakarak hola tomak fatin ne'eba, maibe ami la aseita, no ami mos la aseita fatin ida ne'e, no mai sei hatudu fatin seluk, tanba ami la'os la koopera Governu no Estadu, maibe ami sei hatudu fatin seluk, bainhira Empreza ne'e tun ba ami koopera sei hatudu fatin seluk ba sira.

Nune’e Primeiru Ministru (PM) Taur Matan Ruak husu Kaisidu oan, tenki kualia ba malu, tanbá komunikasaun la’o ladiak, hodi hatudu momos katak, bainhira kompañia iha area refere, la husu lisensa ba Kultura tama halo tuir sira nia hakarak, nune’e Primeiru Ministru husu fila ba halo komunikasaun ba malu hodi di’ak, nune’e rezolve problema ne’e nu’udár timor oan. (BT)