DÍLI----Ministru Presidensiál Konsellu Ministru (MPKM), Fidelis Manuel Leite Magalhães hateten, Projetu Resolusaun Governu nian Konaba Planu Asaun Nasionál ba Ema no Difisiensia hetan Aprova husi Reauniaun Konsellu Ministru atu oinsa garante promosaun ba direitu ema ho Defisiénsia iha periodu tinan 2021-2030.

“Ohin mos hetan aprovasaun ba projetu Rezolusaun Governu nian kona-ba Planu Asaun Nasionàl ba Ema ho Defisiénsia husi tinan 2021 to’o 2030, ne’ebé aprezenta husi Vise-Primeira-Ministra (V-PM) no Ministra Solidariedade Sosiál no lnkluzaun (MSSI), Armanda Berta dos Santos,” Hateten Ministru Presidensiál Konsellu Ministru (MPKM), Fidelis Manuel Leite Magalhães ba jornalista sira, iha sala PKM, Palasio Governu, Kuarta (06/10)

Porta-Voz hatutan, Planu Asaun Nasionál ba ema ho Defisiénsia ho objetivu prinsipál atu garante promosaun ba direitu ema ho Defisiénsia iha periodu tinan 2021 2030, tuir orientasaun sira ne’ebé define ona husi Politika Nasionál ba Inkluzaun no Promosaun Direitu Ema ho Defisiénsia, ne’ebé aprova liu husi Rezolusaun Governu Nu. 14/2012, loron 9 fulan-maiu, liu husi asaun lubun ida atu dezenvolve ho forma artikulada husi entidade publika sira.

Aliende ida ne'e, Komisaria Nasionál ba Direitu Labarik, Dinorah Granadeiro, aprezenta ba Konsellu Ministrus, Relatóriu Periodu Dahaat kona-ba Konvensaun Direitu Labarik nian no protokolu fakultativu sira relasiona ho faan labarik, prostituisaun no pornografia infantil no envolvimentu labarik iha konflitu armadu sira.

Relatóriu ne’e abranje periodu tinan 2015 to’o tinan 2019 ha Konvensaun no husi tinan 2008 to’o 2019 ha protokolu fakultativu sira. Atu rekolla dadus no informasaun husi relatoriu ne'e kona-ba implementasaun husi rekomendasaun sira Konvensaun nian, hala’o konsulta públika ne'ebé luan ho ministériu no instituisaun Estadu sira ne’ebé relevante.

Hafoin finaliza tiha esbosu dahuluk husi dokumentu ne’e, Komisaun Nasionál ba Direitu Labarik nian, rona mos opiniaun no komentériu sira husi organizasaun sosiedade sivil nasionál, estranjeira no Ajénsia Nasoens Unidas. (BT)