DÍLI-----Ministru Presidensia Konsellu Ministru (MPKM) Fidelis Manuel Leite Magalhães, Informa, Konsellu Ministrus aprova ona projetu Dekretu-Lei ne’ebé aprezenta husi Ministru Finansas, Rui Augusto Gomes, kona-ba Kriasaun apoiu finanseiru ba kazu mate ka inkapasidade ne’ebé bele akontese nu’udar rezulta ho vasina kontra COVID-19.

Projetu Dekretu-Lei ida-ne’e hetan tiha ona deliberasaun iha Sorumutuk Konsellu Ministrus iha loron 23 fulan-Juñu tinan 2021, maibé tanba iha faze redasaun finál introdús alterasaun balun presiza submete fila-fali hodi halo deliberasaun foun husi Konsellu Ministru hafoin aprovadu ohin.

“Maske risku husi efeitu sekundáriu grave ne’ebé provoka husi vasina kontra COVID-19 ki’ik tebes, ne’ebé kompensa maka’as tebe-tebes ho benefísiu husi vasinasaun ba populasaun em jerál, inisiativa lejizlativa ida-ne’e ho objetivu atu prevene situasaun, exesionál los ne’ebé ninia efeitu sekundáriu sira grave liu no atu prevee kompensasaun tenke fó ba ema ne’ebé hetan efeitu sekundáriu hirak ne’e,” Hateten Presidente Komsellu Ministru (PCM sigla Portugues) Fidelis Leite Mangalhães iha sasalun PCM Palasio Governu, Kuarta (21/07)

Nia dehan, Dekretu-Lei ne’e define katak iha kazu inkapasidade ki’ik liu 30% ne’ebé provoka husi vasina kontra COVID-19 sei simu kompensasaun ida ho valór dolar amerikanu rihun ida, karik inkapasidade ne’ebé iha entre 30% no 70% sei simu valór dolar amerikanu $2100 no iha kazu vasina provoka inkapasidade boot liu 70% sei simu dolar amerikanu rihun 7.

Nune’e, Iha kazu mate ne’ebé bele akontese tanba simu vasina, sei simu kompensasaun ida ho valór dolar amerikanu rihun sanulu. Verifikasaun husi situasaun ba mate ka inkapasidade no ninia relasaun ho vasina kontra COVID-19 sei hala’o tuir avaliasaun médika no Ministériu Saúde maka responsavel ba rekoñesimentu direitu apoiu nian. (BT)