DÍLI----Prezidente Parlamentu Nasionál (PPN) Deputadu, Aniceto Longuinhos Guterres Lopes, Informa, Parlamento Nasionál (PN) Aprova Proposta-lei enkuadramentu orsamentu estadu no jestaun finanseira públika ne'e aprovadu iha jeneralidade ho rezultadu votasaun a-favór-37, kontra-12 no abstensaun-11.

“Proposta-Lei enkuadramentu orsamentu estadu no jestaun finanseira públika hetan aprovasaun husi deputadu sira no passa iha jeneralidade,” Hateten Prezidente Parlamentu Nasionál, Deputadu Aniceto Longuinhos Guterres Lopes, iha Parlamentu Nasionál, Tersa (06/07)

Nia dehan, Hafoin votasaun iha jeneralidade, plenária halo votasaun dala-ida tán kona-ba proposta-lei ne'e haruka fila ba Komisaun C ne'ebé trata asuntu Finansa Publika hodi diskute kada artigu iha espesialidade, nune'e plenária fó autorizasaun ba Komisaun C ne'e aprovadu ho rezultadu votasaun Afavor-44, kontra-0 no abstensaun-17, Nune’e proposta-lei ne'e haruka ba Komisaun C hodi halo diskusaun iha epesialidade, plenária hein votasaun finál globál.

Nune’e, Governu liu husi Ministériu Finansa propoin halo revizaun ba nameru 3/2009 kona-ba Lei Orsamentu no Jestaun Finanseira. lha proposta-lei foun ne'e mantein artigu hamutuk 16, altera artigu hamutuk 22, retira artigu 17. Entretantu proposta lei foun ne'e aumenta tán artigu 61 kompara ho lei numeru 13/2009 nune’e proposta-lei foun ne'e iha artigu hamutuk 116 kompara ho artigu 55 iha lei vijente.

“Proposta-lei foun ne'e ho objetivu prinsipál rua mak ajiliza iha jestaun pablika no hasa'e transparánsia, responsabilidade, prestasaun konta, kontrolu serbisu no entidade sira iha setór públiku administrative,” Esplika nia.

Iha sorin seluk, Ministru Finansas (MF), Rui Augusto Gomes, Haktuir, Razaun halo revizaun tanba iha limitasaun no lákunas tanba ne'e mak iha proposta lei foun introdus prinsipiu. “Proposta-lei foun introdus prinsipiu 11 ne'e kompostu hosi unidade no universalidade, anualidade no estabilidade no sustentabilidade orsamentál, prinsipiu efikásia ekonomia no efisiénsia, transparénsia, responsabilidade, ekidade interjerasionál, programasaun despeza, espesifikasaun no la kompensasaun,” Dehan nia.

Nia hatutan, Perimetru orsamentál la’os de'it iha retratu di’ak ida kompletu kona-ba despeza maibé atu redus despeza publika ba entidade sira-ne’ebé la inklui iha OJE atu nune‘e entidade sira-ne‘e bele moris mesak ka auto sustentabilidade nomos elementu importante ida hosi proposta-lei mak previzaun orsamentasaun por programa, ne'ebé atu vinkula inskrisaun dotasaun ho atividade ne’ebé preve ona iha planu anuál kada serbisu no entidade nune'e iha OJE la aprezenta de’it despeza maibé tenke hatene mós objetivu atu atinje ho despeza ne'ebé gasta.

“Ita sei halo kuandu ita reforsa ona relasaun planu no orsamentu maka sei fásil atu halo avaliasaun kona-ba efisiénsia no efikasia despeza publika no sei obriga servisu no entidade sira ne'ebé la kumpri objetivu sira ne’e,” Afirma nia.

Nia dehan tan, Orsamentu ida presiza mantein ekilibru entre nesesidade transparénsia ho risku bainhira aprezenta informasaun barakliu, sei la inklui sub-programa hotu iha OJE atu evita dokumentu ne’e sa'e boot liután tanba iha OJE 2021 aprezenta de'it programa no iha tabele 3 iha ona pájina 18 no lei ne'e rasik iha pájina 37, karik mak aumenta tán ho sub-programa maka tabela ne'e sei sa'e pájina 81 no lei ne'e rasik sei aumenta ba Pájina 100.

“Ho orsamentasaun bazea ba programa ita sei uza orsamentasaun botton up no mos kombinasaun ho top down, botton up ida-ne’e katak dotasaun orsamentál bazea ba atividade sira-ne’ebé prevee iha planu anuál kada servisu no entidade,” Informa Nia. (BT)