DÍLI----Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS) Rui Maria de Araújo, Informa liuhusi Komunikadu Imprensa Katak Ohin, loron 4 fulan Maiu 2021, hodi Centro Integrado Gestão de Crises, Sala Situação (CIGC-SS) nia naran, hakarak hato’o ba jornalista, no ba públiku tomak, informasaun pur eskritu dadus jeral ba Timor-Leste tomak, total kazu detetadu foun ohin hamutuk 129 kazus.

“Kazu detetatu foun ne’ebé relata iha dia 4 de Maio 2021: 129 (iha Dili 102, iha munisipiu seluk 27),” Nota KI. Nune’e, Husi total kazu detetadu foun ohin: mane 89, feto 40. Husi total kazu detetadu foun ohin, hirak ho idade tinan <12: 2; ho idade entre tinan 12-59 nain 124 (96,1%); ho idade >60: 3. Husi total kazu detetadu foun ohin: asintomátiku 76,7%. Husi total kazu detetadu foun ohin, 56 (43,3%) maka deteta pozitivu tamba halo teste ho razaun atu halo viajen/ka halo ona viajen ba Munispiu ka ba estranjeiru.

Enkunatu, Total kazu konfirmadu kumulativu iha 4 de Maiu 2021 (sura husi 21 Marsu 2020): 2653. Kazu rekuperadu ne’ebé ralata ohin, dia 4 de Maiu 2021: 69. Total kazu ativu ohin, dia 4 de Maiu 2021: 1315. Husi horiseik mai ohin, dia 4 de Maiu, hamutuk hotu Laboratóriu Nasionál Saúde halo 1005 testes PCR iha Dili, ho detalles hanesan; Vijilánsia sentinela:62. Rastreiu ba kontaktu (Contact tracing): 104. Rastreiu Aleatoriu (Random Screening): 348. Viajen sai husi serka sanitária Munisipiu Dili: 422. Viajen internasionál: 39. Follow up iha quarentena: 30. Total testes PCR ne’ebé halo horiseik dia 3 de Maiu iha Munisipiu sira seluk hamutuk 464, ho detalle hanesan, Baucau: 163; Ermera: 53; Maliana: Maubisse: 133 ; RAEOA: 11 ; Suai: 62 ; Viqueque: 42. Nomos teste follow up ba sira iha fatin izolamentu: 94 (70 negativu ona, 24 sei nafatin pozitivu).

Portantu, Evolusaun Surtu COVID 19 Iha Munispiu Dili, Munisipiu sira seluk nomós RAEOA, atu bele hatene surtu ida ninia evolusaun, no mós surtu ne’e aumenta ka diminui, indikador ida ne’ebé matenek-nain epidemiolojia nian uza, maka insidénsia. Konvensionalmente insidénsia sukat total kazu foun, kada loron, pur 100 mil habitantes, no hatudu risku ne’ebé populasaun iha atu hetan da’et moras ida.

Alende ne’e, média (rata-rata) ba ohin loron, husi insidénsia Covid-19 iha Timor-Leste durante loron 7 ikus maka 6,6/100 mil abitantes, enkuantu ba deit Munisipiu Dili ohin loron nian: 22,5/100 mil abitantes. Insidénsia iha leten sei nafatin hatudu katak Munisipiu Dili maka fatin ho risku bo’ot liu atu populasaun hetan da’et & hada’et tutuan virus SARS-CoV-2.

Ne’e Dunik, Informasaun Husi Izolamentu, Iha dia 4 de Maiu de 2021, izolamentu Vera Cruz halo tratamentu ba kazu detetadu nain 21. Iha área obstetrisia nain 5, medisina interna nain 11, pediatria nain 5. Sira na’in-5 iha obstetrisia, kategoria moderadu hotu, sira nia kondisaun estável. Sira nain 11 iha medisina interna, 4 grave (uza hotu oksijéniu), nain 7 moderadu. Husi kazu 5 pediatria, 4 moderadu, 1 grave. Nain 1 grave uza CPAP, no 4 moderadu la uza ona oxijéniu.

Informasaun Adisionál, Hahú dia 1 de Maiu de 2021, ekipa Saúde na Familia (SnF) iha Munisipiu Dili, hala’o Sentinela Ativa (Active Case Finding) hodi buka tuir no deteta kazu pozitivu iha bairru no aldeia iha Dili laran, ne’ebé deteta kazu pozitivu barak iha semana 2 ikus. Iha loron 3 nia laran (1 -3 de Maiu), Ekipa SnF foti hamutuk 201 amostras, halo Rapid Antigen Test, hafoin konfirma ho teste PCR. Husi 201 amostras ne’ebé rekolla iha loron 3 nia laran, iha 20 maka pozitivu, ka hanesan ho 9,9% (konsistente ho taxa prevalénsia ne’ebé fo’o sai ona loron hirak liu bá).

Enkunatu, Sira ne’ebé pozitivu iha opsaun 2: halo izolamentu iha fasilidade ne’ebé Estadu prepara, ou halo autoizolamentu, wainhira sira nia uma prienxe kondisaun minimu. Ekipa SnF ho lider komunitáriu sira maka monitoriza no halo fiskalizasaun ba kumprimentu regra autoizolamentu. Ekipa SnF iha Munisipiu Dili sei kontinua servisu hodi implementa mekanizmu Sentinela Ativa/Active Case Finding iha bairru no aldeia sira.

Ho ida ne’e, Informa mós ba públiku katak ema moras ne’ebé ba konsulta ka baixa iha HNGV, tenki halo teste PCR atu bele determina se nia infetadu ka la’e, hodi nune’e bele prevene hada’et tutan virus corona ba ema seluk iha ospitál laran. Wainhira pozitivu, tratamentu ba ninia moras sei hala’o iha fatin izolamentu iha Vera Cruz, husi mediku sira no tuir protokolu tratamentu ba ninia moras, ne’ebé uza iha HNGV.

Nomos. Aproveita informa mós ba públiku katak, fatin atu halo teste PCR maka hanesan tuir mai, Wainhira sente moras isin-manas, mear, kakorok moras ka sintoma seluk tan: bele ba konsulta iha Sentru Saúde ne’ebé besik, atu bele halo swab. Wainhira atu husu autorizasaun esepsionál sai husi serka sanitaria iha Dili: bele ba halo swab iha Centro Convenções Dili (CCD). Wainhira sente katak sai kontaktu-besik ba ema ruma ne’ebé detetau pozitivu ona, no seidauk hetan kontaktu husi ekipa konjunta saúde: bele liga ba numeru 119 atu organiza oin sá foti swab.

Ekipa Saúde na Familia (SnF) iha Sentru Saúde sira iha Dili, halo mós vizita ba bairru ho aldeia sira ne’ebé detetadu kazu barak ona. Sira ne’ebé iha sintomas, ka sente kontaktu besik ho kazu pozitivu ruma, bele hakbesik ba sira hodi halo swab. Apela ba populasaun iha Timor-Leste laran tomak atu tu’ur hakmatek, kumpri ho rigor regra serka sanitaria no konfinamentu domisiliáriu ne’ebé Konsellu Ministru deside ona implementa hahú da 30 de Abril. Husu atu hotu-hotu kolabora ho autoridade saúde sira hodi bele buka-tuir ema hotu ne’ebé hetan da’et ona virus ne’e, no izola husi ema ne’ebé seidauk hetan da’et tutan.

Tuir mai tan, Apela ba populasaun iha Dili laran no mós iha Munisipiu sira seluk, atu aprezenta-an iha fasilidade saúde públiku (Sentru Saúde ka Ospitál) ne’ebé besik, wainhira sente isin-manas, ka kakorok moras, ka inus-ben, ka mear, hodi bele hetan atendimentu husi profisionál saúde sira. Wainhira sedu liu hatene se virus ne’e kona ita ka la’e, di’ak liu, hodi nune’e bele hetan atendimentu sedu liu, no prevene tama ba iha situasaun ne’ebé hanaran sindroma insufisiénsia respiratória aguda (SIRA), ka susar/difisil atu dada-i’is.

“Ba populasaun iha Timor-Leste laran tomak, favor respeita nafatin regra prevensaun no ijiéne individual, ne’ebé Governu hatu’ur ona, atu prevene moras Covid-19 da’et ba mai. Regra sira ne’e, hanesan ita hotu hatene ona, maka: (a) uza máskara; (b) fase liman beibeik ho sabaun ka dezinfetante ruma; (c) evita kose liman ba matan, inus ho ibun; (d) wainhira kumprimenta malu, la presiza ka’er liman, bensa-liman, rei-malu ka haku’ak malu; (e) evita halibur malu barak; (f) hamri’ik ka tur do’ok husi ema seluk, mínimu metru ida ho balun,” Nota Informasaun (BT)