DÍLI----Governu Timor-Leste liu hosi Ministériu ba Asuntus Parlamentares no Komunikasaun Sosial kongratula profisionál sira komunikasaun sosiál nian no timor-oan hotu-hotu iha okaziaun selebrasaun loron mundiál liberdade imprensa nian, ne’ebé mundu tomak selebra iha loron 3 fulan-Maiu.

Liberdade imprensa, iha Timor-Leste, hetan garantia husi Konstituisaun, iha artigu n. 40–Liberdade espresaun no informasaun” no n. 41 Liberdade imprensa no meiu komunikasaun sosiál nian sira”. “Objetivu sira hosi Dezenvolvimentu Sustentavel Nasoins Unidas nian ne’ebé Timor-Leste adota, liuliu ho Objetivu 16, ne’ebé defende husi Timor-Leste, afirma determinasaun atu “públiku bele hetan informasaun no proteje liberdade fundamentál sira,” Nota KI.

Governu Konstitusionál da VIII kontinua komprometidu atu promove bebeik dezenvolvimentu setór Komunikasaun Sosiál nian no dezenvolvimentu ba ninia padraun profisionál sira. Índise Mundiál kona-ba Liberdade Imprensa tinan ida ne’e nian, ne’ebé habelar ona hosi asosiasaun Reporter sira ne’ebé la iha Ketan (Sem Fronteiras), hatuur Timor-Leste hanesan nasaun ida ne’ebé hetan klasifikasaun di’ak liu iha Sudeste Aziátiku nian relasiona ho “nivel liberdade nian ne’ebé fó ba jornalista sira”, no tau ita-nia país iha pozisaun 71, sa’e tan pontu hitu kompara ho tinan 2020 nian.

Nune’e mós Timor-Leste mós klasifikadu iha Nasaun sira ne’ebé iha sensibilidade ba profisaun jornalizmu nian entre país 180 ne’ebé hetan ona avaliasaun husi asosiasaun ne’e iha mundu tomak. Iha kontestu atuál Timor-Leste nian, Ita-nia Nasaun hasoru hela pandemia COVID-19, ne’ebé lori impaktu negativu ba ekonomia rai laran.

Aleinde ne’e hasoru mós dezastre naturais, iha ne’ebé provoka estragu dolar amerikanu millaun 100 resin, estragu sira ne’ebé mak atinje populasaun no infraestrutura públika sira ne’ebé provoka ona ema besik 40 liu maka mate. Governu esforsu no halo intervensaun oioin hodi restaura fali saúde públiku kauza hosi Covid-19, estragus infraestrutura sira, no tau matan ba komunidade afetadu sira hosi impaktu siklone tropikál Seroja ne’ebé mak atinje Timor-Leste iha loron 4 fulan abril liubá.

Iha kontextu pandemia covid-19, informasaun mak sai hanesan fatór importante tebes, atu sensibiliza populasaun sira hodi halo reasaun atu prevene pandemia ne’e, Governu entende katak, importante tebes duni atu iha garantia ba órgaun komunikasaun sosiál privadu sira atu iha kondisaun para kontinua servisu iha redasaun ida-idak ninian hodi asegura divulgasaun informasaun no kampaña sensibilizasaun hodi permite populasaun sira iha territóriu nasionál informadu kona-ba evolusaun hosi pandemia ne’e, nomos kona-ba prosedimentu sira seguransa nian no prezervasaun ba saúde públika nian ne’ebé presiza ema hothotu nia kontribuisaun.

Dezde iha tinan 2020 inisiu pandemia Sars-Cov2 tama Timor-Leste, no implementasaun Estadu Emerjénsia, ho konsiderasaun ba papél importante profisionais komunikasaun sosiál sira nian iha luta hasoru pandemia global ne’e, governu aloka verba orsamentu iha fundu Covid-19 nian, hodi apoiu ba jornalista liña frente sira no servisu hamutuk ho órgaun komunikasaun sosiál sira hodi halo kampaña sensibilizasaun ba prevensaun no mitigasaun Covid-19 iha Timor-Leste.

Iha tinan ida ne’e, Governu liu hosi Ministériu ba Asuntus Parlamentares, aloka nafatin verba orsamentu iha fundu Covid-19 nian hodi apoiu ba Jornalista liña frente sira, ba kampaña publisitária sira kona-ba prevensaun no mitigasaun COvid-19 no hakbiit kapasidade órgaun komunikasaun Sosiál sira atu iha kondisaun para halo servisu iha periodu pandemia ida ne’e, nudár parte integradu ida iha planu rekuperasaun ekonómiku nian.

Enkuantu, Sekretáriu Estadu ba Komunikasaun Sosiál, Merício Juvinal dos Reis “AKARA” haktuir mos katak, SEKomS hato’o mós parabens ba Jornalista sira iha Timor-Leste, ne’ebé selebra Loron Mundiál Liberdade Imprensa, la’os deit iha Timor-Leste maibé inklui mós jornalista sira iha mundu.

“Liberdade Imprensa no Espresaun iha ita-nia rain, tuir relatoriu ikus ne’ebé ita simu, Timor-Leste di'ak liu iha rejiaun ASEAN no valor diak Timor-Leste hetan 71 lugar, hatudu katak Liberdade Imprensa Timor-Leste diak iha rejiaun ASEAN, tanba ita nasaun ne’ebé kiik bele hetan apresiasaun internasionál, ita tenki orgullu tanba ita iha kolaborasaun Governu ho Media hotu, hala’o knar tuir nafatin konstituisaun RDTL, hodi hatudu rezultadu ne’ebé diak, jornalista sira tenki promove Liberdade Imprensa diak liu iha ita-nia rain,” Haktuir Hakarak.

Ezekutivu ne’e mós hakarak fó hanoin ba jornalista sira, Liberdade imprensa iha nasaun hetan valor ne’ebé diak, iha naksalak ruma ne’ebé tenki hadia liliu iha rain ida ne’e no tenki hadia produtu jornalizmu, tenki hatudu kualidade ne’ebé ass liu-tan tuir kodegu-etika jornalista nian. Governante ne’e mós husu ba Jornalista sira tuir protokolu husi Ministériu Saúde no Organizasaun Mundial Saúde hodi kuidado ann iha ambitu Pandemia Covid-19. (BT)