DÍLI----Diretor Luta-Hamutuk, José Alves da Costa, Informa, Media sira kuaze iha ASIA ne’e só Timor-Leste uniku nasaun ne’ebé mak liberdade emprensa ne’e a’as liu no numeru-1. Tanba ne’e, Sosiedade Sivil (SS) kongratula ba Liberdade Imprensa (LI) liliu ba jornalista iha Timor-Leste ne’ebé rekoiñese husi Nasaun seluk hodi sai ezemplar.

“Tuir-ha’u nia haree, ita-nia media sira kuaze iha ASIA ne’e so Timor-Leste uniku nasaun ne’ebé mak liberdade emprensa ne’e a’as liu no numeru 1 tanba ne’e mak ita husi parte Sosiedade Sivil mos sai hanesan parseiru ba iha media, sira ami hakarak kongartula ba liberdade imprensa no liliu ba jornalista-nia liberdade ne’ebé mak hetan mos rekoñese husi nasaun sira seluk, nune’e ita bele sai ezemplar,” hatete diretor Luta-Hamutuk José Alves da Costa ba Jornalista BT iha nia kna'ar fatin Luta-Hamutuk Farol, Díli, segunda (03/05).

Nia hatutan, Mezmu ita hetan numeru 1 ne’ebé midia livre maibé ita mos presiza fo hanoin balun tan para atu bele hasae sira-nia performal intsitusaun laos hotu-hotu, laos loro-loron ne’e sempre diak no a’at talves ne’ebé ita hakarak hameno tan ba iha ita-nia midia sira atu servisu mais profesionál liu-liu iha parte publikasaun ninian oinsa mak atu asegura mos ema nia kredivilidade, nomos ema nia integridade. Tanba durante ne’e mos ema balun kestiona kona-ba Mídia balun ne’ebé mak hakerek titulu ne’e oin seluk maibé le’e iha ninia laran ne’e lolos ne’e diak maibé titulu ne’e mak sai hanesan provokativu.

“Ha’u la hatene karik maneira ida oinsa atrai audens oinsa para gosta atu le'e maibé ne’e mos ladun edukativu, tanba ne’e mak liuhusi oportunidade diak ida ne’e ami hakarak hameno liliu ba editor sira tenki hasa’e tan kualidade edisaun ninian para oinsa atu bele eduka le'e na'in sira atu gosta liu tan, nune’e ita-nia valor ne’ebe mak ema hotu rekoñese no ninia valor ne’e sei signifikativu laos tanba ita hotu-hotu livre bele ko'alia saida deit midia bele publika tuir ninia hakarak sira hetan protesaun husi lei maibé labele utiliza liberdade ida ne’e atu estraga fila-fali reputasaun midia sira iha ita nia rai,” Sujere José Alves.

Nia haktuir, Midia nia papel importante tanba midia mak transformador, edukador mos laos iha eskola deit maibé midia nu’udar meius komunikasaun ida ne’ebé mak atu transforma informasaun kredivel husi leten ba iha kraik nomos husi kraik ba iha leten atu nune’e midia sai fontes informasaun atu bele sinkronoza desizaun nivel altu ba iha nesesidade ita nia komunidaded nian no hato'o mos komunidade nia lian ba iha polise meker sira para oinsa atu bele responde.

“Entaun ida ne’e mak ita presiza hato'o ko'alia oinsa midia bele diak liu tan, ita prefere mos atu lori deit asuntu politiku maibé bele mos asuntu sosial sira seluk atu nune’e iha balansu tanba kuaze midia sira iha Timor ita hare'e katak, karik iha midia sira iha pajina balun ladun balansu,” Informa nia. (BT)