DÍLI----Governu liuhusi Ministru Prezidensia Konsellu Ministru (MPKM) husu loja ne'ebé mak fa’an material konstrusaun no loja sembako sira nomos restaurante sira bele loke fila-fali hanesan bai-bain.

Tuir Ministru Prezidensia Konsellu Ministru (MPKM) Fidelis Leite Magalhães hatete katak loja sira ne'ebé mak fa’an material konstrusaun no loja sembako sira nomos restaurante sira bele loke fila-fali hanesan bai-bain atu oinsa komunidade sira bele hola hodi hadia uma no bele hola hahán manas iha situasaun ida ne'e.

“Governu mós halo desizaun ida ba loja sira ne'ebé mak fa’an material konstrusaun sira bele loke fila-fali nune'e ita-nia komunidade sira bele hola no rehabilita fila-fali sira nia uma,” Dehan Ministru Prezidensia Konsellu Ministru (MPKM) hafoin remata enkontru ho liña ministeriais sira ba Jornalista sira Iha Palásiu Governu, Segunda (05/04).

Fidelis haktuir, Husu mós loja sira no Restaurante ka warun sira ne'ebé mak fa’an hahán bele loke fila-fali, nune'e komunidade sira bele hola hahán manas. “Governu kontinua husu loja na'in sira ne'ebé mak fa’an ai han hanesan restaurante sira bele hahú hikas sira-nia aktividade nune'e bele hola hahán manas iha ida ne'e,” Salienta nia.

Ministru Planu no Ordenamentu no Ministru Obras Públiku orienta ona emprezáriu privadu sira ne'ebé mak iha ekipamentu hodi mobiliza no halo atendimentu ba inundasaun ida ne'e. Alende mós Primeiru Ministru mós fó agradese no kontribuisaun hotu, ba membru Governu sira ne'ebé mak hala'o sira nia servisu maibé kontinua husu servisu makás liu tan, nune'e bele kaman ba situasaun ida ne'e.

“Tanbá ne'e, husu obrigadu ba ita nia parseiru sira hotu, Igreja Sosiedade Sivil, Mision diplomata sira hotu ne'ebé mak fo apoiu hamutuk ho Timor-Leste nune'e ita bele ultrapasa ba situasaun defisil ida ne'e,” Informa nia. (BT)