DÍLI----Governu da-ualu liuhosi Sekretariu Estadu bá Komunikasaun Sosiál, Merício Juvinal dos Reis “AKARA”, dehan jornalista nia knar hanesan pilar importante iha divulga kualker situasaun, hodi fó informasaun bá públiku no situasaun agora iha rai-laran kona-ba Covid-19.

Tuir Sekretariu Estadu bá Komunikasaun Sosiál (SEKomS), Merício Juvinal dos Reis “AKARA”, hatete instituisaun ka siguransa tenki halo komunikasaun di’ak ho jornalista sira, atu nune’e hodi fó informasaun bá publiku ho lós no kredivel, labele taka dalan bá jornalista sira nia kobertura. “Ha’u hatene, sala iha interpretasaun iha terrenu, em prinsipiu jornalista nia kna’ar ne’e importante kualker iha situasaun tanba jornalista hanesan fontes bá informasaun, públiku no bá sidadaun hotu-hotu atu asesu bá informasaun ne’ebé lós no labele taka dalan bá jornalista nia kobertura iha kualker situasaun sáida de’it,” Hatete Sekretariu Estadu bá Komunikasaun Sosiál, Merício Juvinal dos Reis “AKARA” bá jornalista BT iha nia knar fatin SEKomS, Kinta (01/04).

Entaun ita ko’alia bebeik hodi instituisaun sira inklui siguransa fó nafatin espasu bá jornalista atu hala’o sira nia knar kolabora ho jornalista atu kontinua divulga informasaun bá ita-nia públiku ne’ebé no husi parte ida ne’e mak los. Nune’e mós, dala-ruma iha terrenu iha individu balun ne’ebé mak iha nia parte servisu makas ladun iha konsentrasaun la distinasaun kona-ba knar jornalista nian ho ema babain, Sekretariu Estadu bá Komunikasaun Sosiál (SEKomS), sei kontinua esplika bá instituisaun hotu-hotu hodi fó espasu no koloborasaun di’ak bá jornalista.

“Hanesan ha’u dehan ita-nia konstituisaun RDTL iha Artigu 40, Liberdade Ko’alia no Informasaun no Artigu 41 Liberdade Imprensa no Komunikasaun Sosiál, ha’u hanoin ita-nia instituisaun sira liuliu bá instituisaun siguransa nian tenki hatene, iha prinsipiu bá sira ne’e la iha problema estadu governu iha garantia liberdadi imprensa, ha’u hakarak dehan dalaruma individu iha terrenu mak interpreta iha parte tekniku mak sala, instituisaun hotu-hotu liuliu governu tenki garantia bá liberdade imprensa sei iha dinamiku balun iha terrenu mak hasoru difikuldade ruma iha terrenu nafatin informa atu kontinua fó avizu bá instituisaun sira atu bele fó orienta bá elementus sira atu kumpri tanba jornalista iha kode etika,” nia Subliña.

Nia haktuir, Bá oin SEKOMS sei kontinua sosializa, kontituisaun RDTL iha Artigu 40 Liberdade Ko’alia no Informasaun no Artigu 41 Liberdade Imprensa no Komunikasaun Sosiál, husu bá instituisaun, funsionariu no siguransa sira tenki iha kuiñesementu, sei iha sosializasaun bá lei hirak ne’e, tenki kontinua enkontru ruma hanesan Konsellu Ministru, Ministerial sira tenki kolabora ho jornalista sira tanba jornalista iha pilar importante kualker situasaun.

Hanesan agora ita iha situasaun Covid-19 informasaun HOAX barak, ita mós tenki fó espasu bá media profisional sira, ne’ebé mak ita fiar par sira hodi kontinua divulga informasaun se la’e ema individu balun aproveita iha situasaun Covid-19 ne’e, sira bele lansa fali informasaun falsu ka HOAX, ne’e mak pilar importante mak media iha Sentru Integradu Jestaun Krize (SIJK).

“Ita informa ona bá sira, iha media officer hodi reprezenta media mós iha ne’ebá atu koordena, hanesan iha tinan kotuk hari ona media senter iha ne’ebá konsiderasaun bá media ne’e ezisti iha no importante bá Jornalista sira-nia kobertura hodi públiku bele hatene informasaun ne’ebé lós no kredivel,” Nia Informa. (BT)