DILI—Governu liu husi Ministerio Agrikultura no Peskas (MAP) sei kontinua fila rai gratuita ba povu ne’ebé kbi’it laek atu sosa konvustivel, tamba povu sei presiza nafatin subsidiu apoiu husi estadu. “Ita mos haree iha fatin balun produsaun agrikultura balun sa’e, iha fatin balun ita haree agrikultor balun ninia kbi’it iha. Pur ezemplu hanesan iha Maliana, ita fo apoiu traktor maibé povu maka iha inisiativa rasik sosa konvustivel,” hateten Sekretatrio Estadu Agrikultura no Arborikultur Ministerio Agrikultura no Peskas Marcos da Cruz ba Jornalista iha salaun MAP Comoro, Dili, Segunda (19/12).

Nia informa katak, komunidade iha Subdistritu Maliana iha duni sira nia inisiativa atu sosa mina rasik hodi ense ba traktor hodi fila sira nia rai. Komunidade sira halo akordu ho diretur distrital, entaun komunidade la complain, dehan katak, tenki gratuitu.

Tamba ne’e governante ne’e hateten katak, neneik-neneik povu tenki selu rasik duni, maibé governnu liu husi Ministerio Agrikultura sei haree kondisaun ne’ebé povu iha.

“Ami mos haree kondisaun que povu sei presiza nafatin subsidiu apoiu husi estadu, tamba ne’e ami sei tau nafatin orsamentu atu sosa konvustivel hodi apoiu ba agrikultores sira,” nia informa.

Governu liu husi Ministerio Agrikultura no Peskas tau orsamentu atu sosa konvustivel ne’e mos ba deit traktor boot para atu fila rai abandonadu, entaun ida ne’e presiza duni konvustivel.

Konvustivel ba traktor ki’ik, nia dehan, agrikultura sira ne’ebé mak governu fo ona, entaun MAP mos sei organiza liu husi extensionista sira ne’ebé mak iha Suku para bele jere rasik traktor ne’e katak, wainhira komunidade uza trator tenki iha operador depois sé mak hetan benefisiu husi trator ne’e.

“Sira mos tenki kontribui hanesan hare lata hira ruma para atu bele halo manutensaun ba trator. Ne’e mos sira rasik mak sosa mina atu tau ba iha trator ne’e. Ne’e jestaun iha grupu ne’e rasik,” katak Marcos.

Informasaun ruma konaba mina, nia dehan, prosesu dezenvolvimentu ne’e la’o neneik, balun ne’ebé mak haree iha kbi’it ona labele garantia ba gratuita bebeik, maibé haree komunidade ne’ebé mak kondisaun seidauk diak governu kontinua fo nafatin gratuitu. (R-6)