DÍLI----Prezidente Komisaun Organizadora ba Federasaun Desportivu Akadémiku Timor-Leste (FDA-TL) 2021, Joviano Sales Reis, Hatete, Kompetisaun ba Federasaun Desportivu Akadémiku Timor-Leste (FDA-TL) ne’ebé kompostu husi Univesidade hotu iha Timor-Leste hetan apoiu maximu husi Sekretáriu Estadu Juventude no Desportu (SEJD) ho total orsamentu rihun $31.

“Orsamentu ba eventu ida ne'e mai husi Sekretáriu Estadu Juventude no Desportu (SEJD) hamutu rihun $31, husi montante ida ne'e sei distribui ba vensedor sira no balun utiliza ba Administrasaun Komisaun Organizadora ba eventu ida ne'e, hatete, Prezidente Komisaun Organizadora Federasaun Desportivu Akademiku Timor-Leste (FDA-TL) 2021, Joviano Sales Reis, iha kampu SEJD Dili, Kinta (18/11)

Nia hatutan, Eventu ba Kompetisaun Federasaun Desportivu Akadémiku Timor-Leste (FDA-TL) ohin hahu serimónia abertura ne'ebé sei kompete husi Estudante Universidade sira hotu iha Timor-Leste, liu husi kordenasaun entre komisaun organizadora ho Universidade sira hotu, ikus mai komisaun rezista atleta sira inklui tekniku sira hamutuk rihun ida resin.

Husi Universidade no Instituto hirak ne'e sei kompete ba modalidade 5 no kategoria 17 mak hanesan, Futeból Mane, Voley boll Mane no Feto, Thaicondo Feto no Mane, Modalidade Xadrez Feto no Mane, Atletismu Mane no Feto, taxa ne'ebé prepara ba Mana'an na'in sira hamutuk 55 ne'ebé kompostu husi tasa rotativa ida.

Nia hatutan, Kompetisaun ne'e sei realiza iha fatin tolu diferente, ida iha Estadiun Mucipal Dili, Kampu SEJD, Kampu FFTL, Sentru Treinamentu Thaicondo no UNTL ba modalidade Xadrez.

Iha sorin seluk, Prezidente Federasaun Desportivu Akadémiku Timor-Leste (FDA-TL), Zeferino Viegas Tilman, Hatutan, Objetivu Prinsipal husi FESDATIL 2021 ida ne'e, atu bele fó espasu no oportunidade ba ita-nia Univertariu sira atu kompete hodi espresa sira nia talentu, liliu tinan rua liu ba ita la konsege realiza tanba impaktu husi Covid-19.

“Iha eventu ida ne'e mos sei fo biban ba atleta sira hodi halo seleksau atu partisipa iha kompetisaun Asean Universidade Gams ne'ebé sei realiza iha Thailandia iha tinan 2022 tanba ne'e mak ami halo Preparasaun no sei halo seleksau ba atleta husi modalidade 5 iha eventu ne'e,” dehan nia.

Enretantu, Sekretariu Estadu Juventude no Desportu (SEJD), Abrão Saldanha, Enkoraja Universitariu sira atu bele hatudu sira nia talentu liu husi modalidade sira ne’ebé sei kompete iha kompetisaun Desportu Akademiku, hodi eleva liu tan sira kualidade tuir ida-idak nia talentu.

“Ha’u sente orgullu bainhira mai partisipa no halo abertura ba eventu Festival Akadémiku Timor-Leste 2021 nian, Estudante sira tenke hatudu imi nia talentu ho di’ak tanba hahu 2014 ita harii Desportu Akademiku atu fó espasu ba Universitáriu sira atu bele hatudu sira nia prestasaun desportivu tanba kada Estudante iha ninia talentu diferente, tanba ne'e mak ita loke eventu ida ne'e hodi fó oportunidade ba Universitáriu sira atu promove liu tan sira nia talentu hodi lori Universidade hatudu ba Timor no bele lori Timor ba Mundu,” Afirma nia.

Hanesan reprezenta governu hakara dezeju no susesu ba Festival ida ne’e, husu ba jogador sira hotu atu bele pratika ho lolos tuir aktividade desportu ninian, hatudu imi nia talentu ho komportamentu ne’ebé di’ak, hatudu imi nia espíritu respeita malu hodi habelar liu tan imi nia talentu ba Públiku, ba Universidade no ba Nasaun.

Portantu, Festival Desportu Akademiku Timor-Leste (FESDATIL) Abertura husi Sekretariu Estadu Juventude no Desportu (SEJD), Abrão Saldanha, no akompaña husi Prezidente Federasaun Desportivu Akademiku Timor Leste (FDA-TL), Jeferino Viegas Tilman, Vise CDTL, Inocencio Araujo da Silva no partisipa husi Universidade 16 hanesan, UNTL, DIT, UNITAL, UNDIL, ICS, UNPAZ, ISC, IPB, Instituto Profisional de Canossa, IOB, ICR, ETCI, Instituto São João de Brito, Instituto Superior de Filosofia e de Teologia, Instituto Filosofico de S. Francisco de Sales, João Saldanha University. Serimonia abertura ida ne’e realiza iha Sekretariu Estadu Juventude no Desportu (SEJD) Dili. (BT)