DÍLI----Vise Kordenadór Movimentu Estudante Tane Oe-cusse (METO), Mateus Lopo, Hatete, Movimentu Estudante Tane Oe-cusse ho voluntariamente organiza Jogadór Atoni oan sira iha Kapital Dili hodi oinsa bele kompete iha Kopa Naval, Falintil-Força Defesa de Timor-Leste (F-FDTL) iha Hera.

“Ho voluntariamente, METO iha inisiativa organiza Atoni Oan sira atu partisipa iha eventu Kopa Naval-2021 tanba iha objetivu rua: Primeiru atu promove maluk oe-cusse oan sira nia talentu desportiva nian, liliu iha futebol nian oinsa sira bele eleva no investe sira nia A'an iha desportu ba futuru. Segundu, atu kria lasu amizade entre Oe-cusse oan ho Oe-cusse oan nomos Oe-cusse oan ho munisipiu seluk ne’ebé maka partisipa iha Kopa refere tanba liuhusi desportu, ita hakesi korente unidade ba malu, entre ema ida ho ema seluk, Munisipiu ida ho Munisipiu seluk,” Hateten Vise Kordenadór Movimentu Estudante Tane Oe-cusse (METO), Mateus Lopo, ba Business Timor iha Hera Dili, Kinta (28/10)

Nia hatutan, Organiza atonioan mai partisipa iha eventu ida ne’e sente kontenti tebes tanba nudar Oe-Cusse oan hanesan parte ida bele ita hakesi korente unidade ba malu, entre ema ida ho ema seluk, Munisipiu ida ho Munisipiu seluk iha area deportivu ninia liliu deportivu futebol. “Ha’u sente orgullu tebes, tanba Oe-cusse oan bele partisipa iha Kopa Naval, mezmu ke ami-nia rai jeografikamente ketak loos iha Estadu Republika Indonesia nia klaran maibé la’os restu mai ami, Ami sei hamorin no haloko Oe-cusse Ambenu nia naran iha Kapitál Dili nomos iha munisípiu seluk , iha jerasaun mileniál ne’e,” Dehan nian.

Nia esplika, Kona ba apoiu husi autóridade RAEOA , ami aproxima ona maibé ate agora seidauk iha resposta serteza ka pozitivu kona-ba apoiu mezmu ke ami-nia pozisaun agora reprezenta atoni oan hotu iha Kopa refere maibé sei tenta nafatin hodi buka dalan atu husu apoiu ba Autóridade RAEOA, nune’e bele tulun Atoni oan sira hodi dudu belun sira promove sira-nia talentu iha desportu nomos hamorin Oe-cusse Oan hotu nia naran.

“Ami-nia preokupasaun maka finanseiru, tanba ami hirak ne’ebé lori belun sira partisipa iha Kopa Naval mesak estudante de’it maibé ida ne’e la’os fatór determinate hodi hamate ami-nia espirítu hodi lori kolega sira ba oin, ami na’in hirak sei buka dalan oinsa hetan finanseiru hodi suporta sira durante jogu tanba ha’u garante Atoni-oan sira nia partisipasaun iha Kopa Naval-2021, sei to’o remata tanba haree husi indikasaun jogadór sira nia boavontade, durante treinu, mai ho pontualidade, disiplina no sempre rona treinador,” dehan nia.

Nia Informa, Daudaun hetan apoiu husi intelektuál Oe-cusse oan balun iha kapital Dili, em termus de apoiu moral, ideia, koranjén inklui finanseiru uitoan ba transporte no be'e hemu. (BT)