DÍLI----Sekretáriu Estadu Juventude no Desportu (SEJD), realiza enkontru ho Ministériu Edukasaun Juventude no Desportu (MEJD) Liu husi Diteror Jeral Edukasaun no Diretor Jeral Edukasaun husi 12 Munisípiu sira inklui RAEOA atu halo Preparasaun ba realizasaun planu dezenvolvimentu desportu edukasionál no eskolar 2021.

“Enkontru ohin ita bolu dehan komite Desportu eskolar ne'ebé lei organika hatur katak, Ministériu funsiona iha ezekutivu ida mak aktividade Desportu eskolar husi Diresaun jeral do ensino, diresaun eskolar no desportu inklui diretor jeral Munisípiu sira hola parte iha komite ida ne'e atu kordena aktividade sira kona ba Desportu eskolar,” Hateten Sekretariu Estadu Juventude no Desportu (SEJD), Abrão Saldanha, ba Jornalista sira iha edifisiu SEJD Dili, Kinta (14/10)

Nia hatuan, Antes ne'e, hala'o ona enkontru kona ba asuntu ida ne'e iha tinan kotuk, maibé tanba pandemia Covid-19 mak ita la konsege realiza tan enkontru, ohin foin konvoka tan enkontru hodi halo Preparasaun ba Desportu Eskolar. Estabelesimentu organizasaun eskolar no estimula aktividade desportu eskolar, ida ne'e mak ohin ami realiza enkontru hodi kontinua halo advokasia atu halo sensibilizasaun kona ba importansia desportu ba alunu sira nian,” dehan nia.

“Aktividade desportu hanesan aktividade importansia fizika no formasaun integral ema ida nian, formasaun karakter foin sa’e ida nian, tanba ne'e maka obrigasaun legal ne'ebé iha no lei baze edukasaun hatete katak, aktividade fizika desportu eskolar ne'e hola parte ba planeamentu kurikular no okupasaun tempu livre labarik sira nian, nune'e, ami hanoin atu halo Preparasaun, oinsa hahu serbisu ba aktividade Desportu eskolar,” Esplika nia.

Nia dehan, Atu estabelese aktividade Desportu eskolar ne'e, daudaun sei halo sensibilizasaun ba prosesu levantamentu rekursu ne'ebé ita bolu rekursus desportivas iha Eskola sira ne'ebé inklui fasilidade desportu, kampu, infraestrutura no profesor edukasaun fizika no desportu hira mak iha kada Eskola. Hahu husi levantamentu ida ne'e mak ita sei hahu dezenvolve programa hodi minimiza dezafiu ne'ebé eskola sira enfrenta iha terenu.

Nia relata, Tinan ida ne'e mós tau orsamentu atu organiza jogu ba eskola sira, daudaun ita organiza ba de'it Ensino Secundária sira, no sei haree ninia implementasaun tanba alunu sira lakon tia sira nia aula prezensiál durante tempu naruk nia laran tanba impaktu husi Covid-19. “Agora foin mak reativa fali prosesu aprendizajen prezensial iha kada Eskola, nune'e muda uitoan kalendariu Ensinu, bainhira sira iha tempu feriadu bele aproveita realiza jogu eskolar, nune'e bele ajuda sira nia formasaun,” Salienta nia.

Nia Dehan tan, Ema ne'ebé mak atu organiza aktividade Desportu eskolar mak mestre sira ne'ebé ita bolu dehan, Profesor Edukasaun Fízika no Desportu, ema sira ne'ebé hasai kursu ba área ida ne'e rasik. Maibé ita menus rekursu ba área ida ne'e tanba realidade mestre barak mak la mai husi sira nia área estudu hanesan edukasaun fízika no desportu, Mestre balun mai husi siensia polítika no balun husi área seluk maibé tanba sira atleta iha esperiensia joga, entaun sira sai de'it professor.

Nia Salienta, Ida ne'e mak problema, ida ne'ebé Governu no estadu Timor esfrenta kona ba dezenvolvimentu desportu, liliu desportu edukasionál maibe daudaun ita halo koperasaun ho Universidade Nasionál Timor Lorosae (UNTL) ho Cuba atu lori mestre edukasaun fízika no desportu mai atu ajuda hanorin no prepara sira, bainhira nesesariu ita bele lori fali ba ajuda hanorin iha eskola sira ho tekniku no dalan propriu.

“Tinan ida ne'e ami preve orsamentu hamutuk rihun $211 ba desportu eskolar, ne'e ba Ensinu sekundária no Tékniku Vokasionál, ba ensino báziku tinan ne'e sidauk bele realiza, bainhira ita iha rasik organizasau ba ida ne'e mak bele realiza tan ba ensino báziku. Tuir planu aktividade Desportu eskolar depois de kalendariu ensinu, bainhira alunu sira ezame hotu mak foin realiza, Informa nia. (BT)