DÍLI----Iha loron Tersa (12/10) Abertura ba Liga de Futebol Timor-Leste (FTL) ba epoka segundu divizaun iha kampu futebol Estadiu Munisípiu Dili, jogu dahuluk FC Porto Taibesi konsege halakon FC Zebra ho rezultadu skor 2-1.

Iha jogu dahuluk durante minitu 45, haree katak, FC Portu Taibese mak dumina bola iha kampu laran maibé ekipa rua ne’e hatudu jogu di’ak ne’ebé atake ba malu no halo jogu ne’e rame iha kampu Estadiu Munisípiu Dili tanba ekipa ida-idak defende ninia klubu hodi hamosu rezultadu impata iha jogu primeiru.

Antes ne’e jogador FC Porto ho numeru kamizola 9 hatama golu ida ba FC Zebra maibé arbitru konsidera golu ne’e invalidu tanba ouside. Hafoin intervallu 15 minutus, hahu fali segundu jogu, ekipa rua ne’e komesa fo presaun ba malu kontra-atake ne’ebé halo jogu ne’e manas liu tan ho ambisaun atu hatama golu maibé defeza ida-idak defende ninia klubu la husik liu avansadu sira hodi hatama golu.

Iha minutu ikus, jogador FC Porto taibese João Pereira, suta bola husi kantu no jogador Januario Pinto ho numeru kamizola 5 aproveita hodi hatama golu ida ba FC Zebra no lori FC Porto Taibesi mana’an FC Zebra ho skor 1-0. Portantu, hafoin remata jogu, Jogadór, Januario Pinto, Sente kontente tanba lori FC Porto ba Vitoria hodi mana’an FC Zebra iha primeiru jogu.

“Ha’u sente kontente tebes nu’udar ekipa dahuluk gaña Vitória iha jogu segundu divizaun ida ne’e, ha’u kontente tebes tanba ho ha’u nia golu úniku bele óferese ba ekipa Porto Taibese, ba oin sei prepara nafatin hodi hadia di’ak liu tan jogu ne’e no karik jogu tuir mai ha’u bele hatama golu nafatin,” Hateten jogadór, Januario Pinto, ba Jornalista sira iha Kampu Futebol Estadiu Munisipiu Dili, Tersa (12/10/).

Iha sorin seluk, Treinador FC Porto Taibesi, Jose Moniz de Jesus Gomes, Hatutan, Jogu ohin di’ak no sente kontente, fó parabéns ba jogador FC Porto Taibesi tanba bele mana’an FC Zebra, mezmu iha fallansu maibé sei esforsu treinu atu bele hadia iha jogu tuir mai.

Entretantu, Treinador FC Zebra, Rogeiro Mog, Apresia ho nia jogador sira no konsiente ho fallansu husi ekipa Zebra liu husi liña defeza maka bele fó oportunidade ba Fc Porto hodi marka golu ida.

“Apresia ho ha’u-nia jogador sira mezmu sira nia mentalidade sidauk bele maibé sira hatudu ona jogu diak tanba iha primeiru jogu durante minutu 45, jogador sira esforsu maka’as hatudu rezultadu impata iha jogu primeiru. Iha jogu segundu, minutu ikus, remata bola husi kantu mak FC Porto hatama golu ida, ne’e hanesan sorte deit no iha fallansu husi defeza maibé hau simu realidade rezultadu jogu ohin no ami sei esforsu atu kontinua treinu nafatin,” Afirma nia. (BT)