DÍLI----Estudante husi Postu Administrativu Nibete, husi Região Administrativu Espesial Oe-cusse Ambeno (RAEOA) ne’ebé hala’o estuda no buka moris iha Kapital Dili halibur malu hodi realiza jogu amizade atu oinsa hanoin hikas no halo refleksaun ba loron konsulta popular 30 de Agustu Timor Leste vota dahuluk hodi deside ukun rasik aan, ba dala ruanulu-resin rua (22).

“Ami husi Estudante, Unidade Suku Banafi (USBAN) nu’udar Estudante husi Postu Administrativu Nitibe iha Região Administrativu Espesial Oe-cusse Ambeno (RAEOA) ne’ebé mai estuda no buka moris iha kapitál Dili, halibur malu realiza jogu amizade hodi komemora loron konsulta popular 30 de agusto hodi hanoin hikas loron importante ne’ebé Timoroan hala’o eleisaun dahuluk iha loron 30 fulan Agustu 1999, atu determina ukun rasik a’an,” Hateten Estudante Calisto Cono Falo ba Jornalista Business Timor iha Kampu Futsal BOP, suku Kaikoli, Domingo (15/08).

Nia hatutan, Estudante no joven ne’ebé mai iha kapital Dili, dala ruma la koñese malu mezmu husi suku ida deit tanba mai husi fatin ka aldeia ketak-ketak, mai iha sidade Dili, balun Eskola no balun buka moris, difisil atu koñese malu tanba hela fatin ketak-ketak iha kapitál Dili, tanba ne’e, liu husi aktividade desportu ida ne’e bele halibur foin sa’e sira atu hametin liu tan unidade iha sidade Dili.

“Ami nu’udar Atoni oan husi suku Banafi ne’ebe iha grupu ida naran, Unidade Suku Banafi (USBAN), husi postu Administrativu Nitibe, Região Administrativu Espesial Oe-cusse Ambeno (RAEOA), iha inisiativa atu halibur malu hodi realiza jogu amizade ida ne’e, atu komemora loron konsulta popular no husi jogu ida ne’e atu hametin liu tan ami nia lasu amizade no unidade nu’udar Oe-cusse oan iha sidade Dili,” dehan Calisto.

Nia dehan, Atividade desportu ida ne’e ami sempre hala’o iha tempu Paskua, Natal no loron bo’ot sira seluk. Maibé iha tinan 2020 to’o 2021 ami labele realiza jogu tanba impaktu husi Corona virus (Covid-19), ne’ebé ita nia Nasaun mos aplika estadu emerjensia, serka sanitária no konfinamentu obrigatóriu. Maibé la halakon ami nia espíritu no vontade maka ohin ami kontinua realiza jogu ne’e.

Entretantu, Ongqui Correano Beno, nu’udar Xefe komisaun organizadora ba jogu amizade refere, haktuir tan, Eventu ki’ik ida ne’e hanaran “USBAN-CUP”. Nu’udar jerasaun foun hakarak halibur malu hodi realiza torneiu ida ne’e, atu komemora loron importante 30 de Agusto hanesan loron konsulta popular ne’ebé atu hanoin hikas katak, loron 30 de Agustu mak loron determinante ba Timor-Leste nia ukun rasik a’an. “Husi jogu ida ne’e bele promove diak liu tan foen sa’e sira nia talentu kona ba desportu ninian,” Ralata nia.

Nia hatutan, Orsamentu husi jogu ida ne’e la iha, ami loke hanesan animasaun ida ba estudante no joven sira husi suku banafi, Nitibe RAEOA ne’ebé hela iha sidade Dili. Maibé iha jogu ida ne’e, kada klube halo rezistrasaun ho osan $15.00 dolar amerikanu. Husi orsamentu ida ne’ebé kada grupu rezistu maka tau hamutuk, hafoin distrubui fali ba sira ne’ebé sei sai vensedor ba jogu amizade refere. “Ami agradese no obrigadu barak ba Pólisia BOP ne’ebé óferese sira nia kampu ba ami atu realiza torneiu ida ne’e. Primeiru ami halo kordenasaun uluk ho sira hafoin ami halo tan karta formal ida ba sira no autoriza ami atu hala’o jogu iha sira nia kampu” dehan Ongky.

Iha sorin seluk, jogador, Mateus Nautos, Sente kontente ho jogu amizade ne’e tanba bele promove sira nia talentu no hamentin nafatin sira nia unidade nu’udar Banafi oan ne’ebé mai aprende no buka moris iha sidade Dili.

“Hau sente kontente tebes, tanba liu husi jogu USBAN-CUP ida ne’e, bele promove no hasa’e ami nia talenttu kona ba desportu ninian, hau sente orgullu tanba realidade hatudu ona katak, husi Federasaun Futeból Timor-Leste (FFTL), liu husi Klube Sporting Timor FC, bolu ona hau atu joga tuir sira nia Klube iha Liga Amadora Timor-Leste, husi ne’e maka sei promove no kontinua hau-nia talentu iha nivél Nasionál,” dehan Mateus.

Portantu, Torneiu ida ne’e, partisipa husi Banfi oan hotu ne’ebé hela iha sidade Dili, kompostu husi klube hitu (7) hanesan, FC. Fomentasi A ho B ne’ebé mai husi Fomentu ho Tati-tolu, FC. Aitara-klaran (Cenban), Kampu Alor ne’ebé kompostu husi (FC. PM A ho B) no FC. Johata A ho B ne’ebé kompostu husi Toana-laran, kaikoli, Aspol ho Ailok-laran.

Eventu ne’e hala’o iha kampu Futsál Policia BOP ninian, iha Suku Kaikoli Postu Administrativu Verra-cruz Munisipiu Dili. Jogu refere hala’o ho loron Domingu deit tanba loron segunda to’o sabadu haree aktividade Eskola no seluk tan Jogu ne’e hahu iha loron 4 fulan Jullu no sei termina iha loron 30 fulan Agustu Tinan ne’e. (BT)