DÍLI----Espoza Prezidente Repúblika (PR) atual Primeira Dama, Cidália Lopes Nobre Mouzinho Guterres, Hala’o abertura ba Kopa Rotativu 30 de Agostu ba joven sira atu oinsa bele hala’o jogu amizade hodi halo refleksaun ba loron komemorasaun votasaun (konsulta popular) iha Aldeia Mota-Ulun, Suku Bekora, Postu Administrativu Kristo-Rei.

“Ohin ha’u mai iha ne’e ónra bo’ot ida ba ha’u atu mai to’o Aldeia Mota-ulun hodi partisipa iha programa ida ne’ebé ita-nia xefe aldeia hamutuk ho joven sira kria komisaun ida atu halo jogu ida ne’e ho ambitu selebrasaun ba loron konsulta popular 30 de Agostu (Votasaun) ba dala ruanulu resin rua (22),” Hateten Espoza Prezidente Repúblika, Cidália Lopes Nobre Mouzinho Guterres, ba jornalista sira iha Aldeia Mota-Ulun, Suku Bekora, Kinta (12/08).

Primeira Dama hatutan, Liga ba loron 30 de Agostu ita hotu hatene katak prosesu luta ba ukun an ne’e nakonu ho Matan-been, Laran susar no nakonu ho terus no sakrifisiu oi-oin. Antes ita tama ba loron 30 de Agostu 1999 iha loron 20 de Agostu hanesan loron FALINTIL ninian no iha loron 3 de Agostu 1983 akontese masakre boot ida iha Kraras iha ne’eba inimigu sira hamate ema barak, liu-liu mane sira oho hotu no husik deit labarik no feto faluk sira, tanba ne’e antes ita tama ba loron 30 de Agostu ema barak mak lakon sira nia vida ba Rai ida ne’e.

“Hau Apresia tebes ho inisiativa husi komisaun organizadora hamutuk ho Xefe Aldeia ne’ebé iha vontade no hakarak atu halo programa ida ne’e liga ho loron komemorasaun konsulta popular 30 de Agostu no inisiativa ida ne’e diak tebes atu halibur joven sira iha Aldeia ida ne’e,” Dehan nia.

Nia akresenta, Fulan Agostu ida ne’e fulan ida ne’ebé importante teb-tebes atu hanoin fali loron 30 de Agostu hanesan loron konsulta popular, hanesan loron ida ne’ebé mak sidadaun hotu iha Timor-Leste hala’o Eleisaun ba dahuluk hodi hili ukun rasik a’an.

Nune’e, Ohin loron iha ona era ukun a’an, ita bele goza independénsia ida ne’e, tanba ne’e ita fó ónra no Glória ba ita nia erói sira. Ita sira ne’ebé sei moris lori nafatin espíritu unidade hodi tane no servi ita nia rai diak liu tan ba oin no povu bele moris ho hakmatek.

“Dalabarak ema dehan problema mosu tanba joven sira maibé ha’u hanoin katak lae, ida ne’e responsabilidade ita hotu nian, joven sira kuandu ita kuidadu, fó oportunidade ba sira no rona sira nia lian, ita bele halo saida mak sira hakarak hodi partisipa iha dezenvolvimentu ukun a’an ida ne’e. Liu husi aktivade desportu ida ne’e ha’u apresia tebes, uza didiak oportunidade ida ne’e atu kontinua la’o ba oin, manan ka lakon la’os kestaun, importante mak kria amizade no unidade,” dehan nia.

Portantu, Agusto Mendonça nu’udar Prezidente Komisaun Organizadora, hatete, Jogu amizade ida ne’e atu refleta loron konsulta popular ne’ebé akontese iha loron 30 fulan Agostu iha tinan 1999 ne’ebé liu ona tinan-22. Husi loron ne’e mak determina ita-nia ukun a’an, ohin selebra hodi hanoin hikas katak joven ida uluk sakrifika sira nia an no ema barak mak mate tanba atu liberta Pátria no povu ida ne’e ba ukun rasik a’an. Joven ida agora presiza hatudu sira nia partisipasaun ba dezenvolvimentu liu husi aktividade desportu no aktividade fiziku sira seluk ne’ebé presiza halo hodi kontribui ba paz no estabilidade ba rai ida ne’e.

Nia hatutan, Liu husi programa ida ne’e, ami hetan apoiu husi Espoza Prezidente Repúblika, Cidália Lopes Nobre Mouzinho Guterres no hetan apoiu mos husi Sekretariu Estadu Juventude no Desportu (SEJD), ami halo proposta no halo audensia ho sira, hetan ona resposta pozitivu maibé orsamnetu ne’e ami seidauk utiliza, agora uza deit kontribuisaun husi komunidade Aldeia Mota-Ulun”.

“Eventu ida ne’e kompostu husi Modalidade rua, Futsal halo ba mane deit hamutuk klube-18 no voliból kompostu husi Feto ho Mane hamutuk klube-8. Kada klube halo rezistrasaun ho osan $10.00 dolar amerikanu, total orsamnetu husi programa ida hamutuk dolar rihun tolu, Atus lima ($3.500.00 )”. Orsamnetu ida ne’e uza ba halo kampu Futsál inklui ba aktividade abertura no enseramentu ba programa desportu ne’e rasik.

Atividade desportu ne’e hahu iha loron 12 to’o loron 30 fulan Agostu no husi eventu ne’e hetan partisipasaun maksimu husi joven sira no komunidade tomak husi aldeia Mota-Ulun.

Entretantu, Luis Do Carmo nu’udar Xefe Aldeia Mota-Ulun apresia ho inisiativa husi juventude aldeia Mota-ulun nia vontade ne’ebé kria eventu ne’e hodi halibur joven sira hotu. “Hau hakarak husu ba ita hotu nia prezensa iha fatin ida ne’e atu selebra loron konsulta popular, hau hakark joven sira tenke respeita malu, hadomi malu iha fatin ida ne’e to’o jogu ne’e remata,” dehan Luis.

Iha sorin seluk, Administradór Postu Administrativu Kristo-Rei, Gaspar Soares, Haktuir, Hau louva no apresia ba joven sira hotu nia vontade ne’ebé loke eventu desportu ida ne’e. “Hau sente orgullu agradese tanba eventu ida ne’e hetan apoiu maksimu husi inan-aman sira, tanba imi bele halo kampu foun ba joven sira, ida ne’e ezemplu diak ba komunidade sira seluk. Tenke kaer metin imi nia unidade ne’ebé hatudu ona ba ema barak, kontinua promove imi nia talentu hahu loron ohin no ba futuru” Informa Nia. (BT)