DÍLI----Xefe Administrasaun ba torneiu Maskarinhas-Cup Sandra Leila, Hatete, Joventude iha Suku Mascarinhas dadaun hala’o kompetisaun ida hodi oinsa komemora loron konsulta popular ne’ebé sei monu iha loron 30 fulan Agustu.

“Ami hala’o kompetisaun ida ne’e hodi komemora loron konsulta popular ne’ebé sei monu iha loron 30 fulan Agustu. Kompetisaun ne’e hanesan amizade ida ne’ebé hakarak halo animasaun ba ami-nia suku ne’ebé kompostu husi ami nia aldeia no bairo hotu iha suku Maskarinhas,” Hateten Xefe Administrasaun Torneiu Maskarinhas-Cup, Sandra Leila ba Jornalista Business Timor iha iha kampu Futsal suku Maskarinhas, Kuarta (11/08).

Nia hatutan, Iha torneiu ida ne’e mos la’os husi ami-nia bairo deit maibé konvida mos bairo seluk husi suku seluk hodi hatudu ba ema barak katak amizade ida ne’e involve ema barak hodi hamutuk kria jogu ida ne’e. Suku seluk ne’ebé partisipa iha torneiu ida ne’e mak, Audian, Vila-Verde, Bairo Maloa, Bemori, Bidau no Delta.

“Jogu ida ne’e kompostu husi sub 12 no sub 15 nian, katak kompostu husi labarik ho idade 12 no idade 15 mak bele joga iha kompetisaun ida ne’e. Husi sub 12 nian iha klube 9 no sub 15 nian iha klube 23, ne’ebé hamutuk klube 32,” dehan Sandra.

Nia esplika, Kompetisaun ida ne’e kontribui rasik husi ema sira ne’ebé iha inisiativa atu kria jogu amizade ida ne’e. “Ami la hetan apoiu husi parte Governu maibé ami hetan orsamentu husi klube sira ne’ebé mai rezistu iha torneiu ida ne’e, barak ka uitoan, ne’e naton ba ami tanba objetivu husi kompetisaun ida ne’e katak, hakarak kria amizade ba ami-nia suku liu-liu ba ami nia aldeia ka bairo. Kada klubu halo rezistrasaun $30.00 dolar amerikanu no husi jogu ida ne’e mos hetan apoiu $400.00 dolar amerikanu husi David Corte Real,” Salienta nia.

Maske orsamentu ne’e la sufisiente hodi loke torneiu ida ne’e maibé ami halo serbisu ho fuan ho domin tomak hodi oinsa hakarak enkora ba joven no labarik sira atu hatudu disiplina iha jogu nia laran no tenke promove nafatin talentu idak-idak nian. Husi jogu ida ne’e enkoraja atu kria amizade ba joven no labarik sira iha bairo hotu-hotu atu labele mete problema maibé tenke kontribui ba paz no estabilidade ba iha komunidade nia leet. Husi jogu ida ne’e suporta maksimu husi xefe suku Maskarinhas no xefe aldeia sira mezmu la iha apoiu finanseiru maibé sira nia partisipasaun importante tebes.

Entretantu, Jogador husi sub 12 husi Bairo Ribeiro Maloa, Tiago Messi Jeferino da Silva, sente kontente tanba jogu ida ne’e bele promove diak liu tan ami nia talentu iha futeból ninian no liu husi jogu ida ne’e bele kria amizade ho bairo seluk tanba hasoru kolega barak. Iha sorin seluk, Xefe Suku Maskarinhas, Rui Ilídio de Araújo, Louva no apresia ho iniasitiva husi joven sira, oinsa bele kria amizade iha suku ne’e nia laran atu anima labarik no joven sia.

“Tanba labarik sira la iha aktividade estudu iha Eskola, entaun liu husi aktividade desportu ida ne’e, sira bele halibur malu hodi kria amizade atu halokon sira nia sentimentu tristeza, tanba loron-loron iha uma deit, labarik sira nunka halo buat ida. Husi eventu ne’e atu anima labarik sira tanba sira nia aktividade eskola paradu kleur loos, kuaze tinan ida ona,” Haktuir nia.

Nune’e, Aktividade kompetisan ne’e hahau iha loron 8 fulan agusto no sei termina tuir orariu ne’ebe kria husi komisaun organizadora. Nia Informa, Husi Autoridade lokal la iha apoiu finanseiru ba eventu ida ne’e, maibé hahu insiu sira halo rezistrasaun kada klube, hatama osan tuir informasaun no kritéria ne’ebé fo sai husi Komisaun organizadora sira ba klube hotu. Husi orsamentu ne’ebé sira rezistu maka sei distribui fali ba sira ne’ebé sei sai vensedór ba jogu refere. (BT)