VENILALE----Jogu Dom Bosco Cup ba tinan ne'e to’o ona rohan, Sábadu (27/02/2021). Ekipa rua ne’ebé tadu-hasoru iha Finál tinan 2021 mak klubu Waisa no Natureza. Jogu finál ne’e selebra la’o ho di’ak, iha Kampu Futebol, Postu Administrativu Venilale, Muisípiu Baucau.

Husi observasaun mídia MTCI katak, biar udan boot no Kalohan abu-abu taka metin kampu laran, maibé la hamate antusiazmu komunidade atu mai asiste jogu finál ne’e. Duelo entre Waisa no Natureza hatudu jogu atrativu no ho espíritu amizade. Dahikus rezultadu demontra katak, klubu Waisa mak sai vensedór ba klubu Natureza ho skor 2-1. Nune’e klubu Waisa mak sai kampiaun ba Dom Bosco Cup 2021.

Iha jogu finál ne’e bazeia ba konvite, hetan partisipasaun direta husi Sua Excelensia Ministru Turizmu Komérsiu no Indústria (MTCI), Dr. José Lucas do Carmo da Silva, Xefe Casa Sivil, Dr. Francisco de Vasconselhos no Komandante PNTL Munisípiu Baucau, hodi hala’o abertura no asiste lala’ok jogu finál Dom Bosco Cup 2021 to’o remata.

Tanba udan boot no abu-abu falun metin kampu foteból, la fó biban konvidadu mós administradór postu atu entrega Taxa Dom Bosco Cup ba klubu Waisa ne’ebé sai kampiaun. Nune’e mós la bodik atu entrega prémiu ba mellor jogadór no mós ba jogadór ne’ebé hatama golu barak liu (top Scorer) no ekipa ne’ebé jogu mós liu (fair play team). (BT)