DÍLI----Sekretaria  Estado Juventude no Desportu (SEJD) realiza segundu atividade voluntariu juventude  motivador ba dezenvolvimentu (VJMD) iha area rurais ho partisipasaun juventude hamutuk nain 75 husi 11 munisipiu iha 15 suku, ho tema “ita nia partisipasaun voluntariu iha dezenvolvimentu, lori mudansa ba povo nia moris” ne’ebe halao durante loron lima iha edifisiu SEJD husi dia (28-02/10).

Xefé Departementu Area Formasaun no Promosaun Marcus da Costa hatete, objetivu husi atividade ida ne’e atu fo motivasaun ba joven sira liu-liu iha area rurais, hodi aprende oinsa mak atu dezenvolve sira nia suku rasik para bele fo benefisiu ba sira nia komunidade, liu husi saida mak sira hare’e hodi sai programa prioridade ba komunidade hodi implemeta, ne’e dunik sira mak sei identifika programa saida mak sai prioridade ba sira nia suku rasik.

Nia hatutan, wainhira joven sira iha ona programa prioridade atu implementa maka sira iha obrigasaun atu halo proposta mai SEJD hodi hetan, fundus skala ki’ik ho montante mill kinentus to sinku mill tuir programa sira nian, i suku no aldeia ne’ebe agora sai hanesan tarjeitu ba implementasun programa  refere hamutuk 15 suku husi area remotas ne’ebe mai husi 11 munisipiu,”dehan Marcus ba Jornalista BT iha edifisiu SEJD, tersa-feira (29/09).

Entertantu Suku area remotas kompostu husi, Suku Faturelau munisipiu Aileu, Suku Monumoge no Suku Mantu husi munisipiu Ainaro, Suku Alau Kraik no Namanei husi munisipiu Baucau, Suku Nano munisipiu Covalima, Suku Makadade no Makili husi munisipiu Dili, Suku Lauana munisipiu Ermera, Suku Manlala munisipiu Manatutu, Suku Turiskai munisipiu Manufahi, Suku Leotla munisipiu Likisa, Suku Bahatata munisipiu Vikeke no Suku Banasi no Sone-Ufe munisipiu Oecusse. Entertantu orsamentu ne’ebe SEJD propoin hodi fo apoiu ba atividade refere  to implementasaun ho montante $114,728.025. 

Iha fatin hanesan Manuel ximenes husi Suku Nunmoge Postu Administrativu Hatubeliku munisipiu Ainaro sublinha, hanesan juventude nia senti kontenti tanba bele hetan formasaun ida ne’e hodi dezenvolve nia suku rasik inklui aumenta nia kapasidade, tanba ne’e  nia mos husu ba SEJD atu kontinua implementa programa ida ne’e,  hodi nune’e komunidade hotu ne’ebe ejisti iha area rurais bele senti dezenvolvimentu nia lalaok. Konaba programa saida mak atu implementa iha suku Nunmoge Manuel hatete, agora dadaun nia seidauk bele identifika maibe depois de fila mak nia foin bele hare’e, saida mak komunidade suku Nunmoge persija iha sira nia moris hodi sai benefisiu ba loron aban. (BT)