DILI----Relasiona ho rezultadu husi eventu internasional ne’ebe realiza iha Korea foin lalais ne’e, Centru Treinamentu Juvenil Timor-Leste (CTJTL) aprezenta rezultadu tasa (piala) ne’ebe futebolista sira hetan ba Primeiru Ministru, Sekretaria de Estado Joventude no Desportu (SEJD) inklui Federasaun Futebal Timor-Leste (FFTL) iha edifisiu SEJD, tersa-feira semana liuba.

Presidente CTJTL Alexandre Victor hatete, futebolista juvenil foin lalais ba partisipa eventu rua iha Korea 2015, kompostu husi eventu Asia Mucth Festival Futeball  no Asian Cup, ne’ebe iha eventu Asia Mucth Festival Futebal nasaun sanulu resin neen mak partisipa. Jogador timoroan sira konsege hatudu rezultadu diak hodi sai hanesan primeiru lugar no segundu lugar inklui juara umum.

“Iha eventu Asian Cup futebolista juvenil hasoru nasaun neen deit, i sira kontinua hatudu performens diak hodi sai nafatin primeiru lugar, melhor ekipa, melhor jogador, melhor golu/top skor! Ne’e duni ami hetan lia menon husi Korea katak, foin primeiru ves Timor-Leste sapurata tasa iha Korea,” Alexandre hatete.

Nia hatutan, hanesan sentru sira sempre hasoru defikuldade barak  ne’ebe  sempre imfrenta, liu-liu jogador sira atu aranka ba partisipa iha eventu internasional inklui kampo propriu ba jogador sira. Ne’e duni nia husu ba governu atu halo colegio foun ida hodi tau hamutuk futebolista juvenil sira, tanba sira mak futuru futebal nian,” Presidente CTJTL iha diskursu edifisiu SEJD, tersa-feira (22/09).

Alexandre mos agradese ba sestu governu konstituisional ne’ebe lidera husi SEJD ne’ebe fo suporta material moral hodi sira bele halo atividade iha Korea ne’eba, inklui treinador nasional ho Mr. King tanba ho sira nia esforsu fahe matenek ohin loron jogador sira konsege hatudu rezultadu positivu. Hodi sira nia apoiu hamorin Timor-Leste iha eventu internasional. Nia husu ba Primeiru Ministru atu tau matan netik ba sentru juvenil hodi kontinua hakiak jogador sira para bele prepara ba futuru. 

Entertantu Primeiru Ministru Rui Maria de Araujo hato’o prabens ba futebolista juvenil tanba ho sira nia dedikasaun no esforsu tomak, konsege lori Timor-Leste ba luta kontra nasaun barak iha eventu internasional hodi lori vitoria mai timor, i exemplu ida ne’e hatudu ba futebolista senior sira para bele banati tuir. (BT)