DILI----Atleta Defisiente ne’ebé iha Federasaun Espesial Olimpic Timor-Leste (FEOTL) nia okos, partisipa iha eventu jogu mundial Los Summer Games iha Los Angeles  California 2015, konsege hetan  medalia osan-mean 3 hodi lori vitoria ne’e mai Timor-Lest. Medalia osan-mean hetan husi atleta ho naran Oscar Alexandre, Feliszarda Marcal no Amelia iha modalidade atletizmu.

Jogu iha Los Angeles atleta ba kompete ho modalidade rua kompostu husi Boxer no Atletizmu ho total  atleta nain 9. Rezultadu ne’ebe sira hetan mak hanesan, medalia osan-mean 3, osan-metan 3, osan-mutin 5, fita 4. Presidente Federasaun Espesial Olimpic Timor-Leste (FEOTL) Maria Domingas Fernandes Alves agradese tanba liu husi Maromak ho Aswain Timor nia haraik bensa liberdade no dignidade ba sira, nudar povo no nasaun atu sira ne’ebe dular ho ema defisiente bele prense moris iha era ukun rasik an, hodi hetan vitoria.  

“Maske atleta ho penas sinku minutu ba sira nia konsentrasaun treinu durante loron sanulu, liu husi esforsu sira nian ho disiplina  halo atan hau aprende dala ida tan atu orgulhu sai timor oan, aprende ho asaun ki’ik atu hametin hau nia patriotismu no nasionalismu, tanba imi nia vitoria maske ita uituan bele habelar ho kontenti iha Los Angel, bainhira ofisiais ho juri prefensiadus anunsiu Timor-Leste nia vitoria ba manan medalia de eoru,” ho matawen Presidente FEOTL haksolok. 

“Tuir juramentu atleta especial olimpic katak, “husik ba hau manan maibe kuandu hau la manan fo kbi’it ba hau atu koko,  nudar  honra no pervilejiu tebes fo haraik an mai ami bele hamrik iha fatin ida ne’e, atu hatur rezultadu husi FEOTL iha jogu mundial Los Summer Games iha Los Angeles  California 2015.  Liafuan ida ne’e mak durante ami harohan wainhira partisipa iha kualker eventu,” dehan Presidente FEOTL bainhira aprezenta rezultadu ne’e iha sekretaria estadu ba juventude no despostu – SEJD, Lesidere Dili semana liuba.

Iha nia diskursu iha edifisiu SEJD, tersa-feira (22/09), eis ministra solidariedade sosial ne’e hatete  visaun husi FEOTL atu hasae esperitu humanu ba sidadaun tomak hodi halakon diskriminasaun kontra ema ho defisiente intelektual ka komutivu. FEOTL hetan apoiu orsamentu husi SEJD ho montante $150,000.00 ba atividade nivel mundial, no $30,000.00 ba atividade desportivas nivel nasional ne’ebe sei halao iha loron rua,  primeiru iha  23-24/09 no segundu sei realiza iha munisipiu Aileu hodi komemora selebrasaun loron 26/09.

FEOTL nudar monumentu global ne’ebe bele kontinua mos sai sustentavel bainhira espritu voluntarismu husi nia estruktura kontinua metin. Apoiu husi estadu ho empreza sira bele hametin liu tan partisipasaun atleta defisiente intelektual husi nivel nasional, regional no mundial. FEOTL nudar monumentu global ida ne’ebe hakarak halo mudansa ba ema ho defisiente intelektual ka komutiva liu husi atividade desportivas, hodi  asegura saude bazika, edukasaun enklusiva no transformasaun ba mentalidade sosiadade ka komunidade nian. Atu promove justisa no inkluzaun sosial hodi hasae espritu dignidade humanu, mudansa global ida ne’e bele akontese bainhira pais ka nasaun ida-idak bele  asumi dunik nia kompremisiu ida ne’e.

Entertantu Primeiru Ministru Rui Maria de Araujo senti orgulhu hodi hato’o parabens murak tebes ba atleta defisiente,  tanba ho sira halo Timor-Leste senti orgulhu boot ba sira nia rezultadu. (BT)