DÍLI----Eventu Tour de Timor ne’ebe realiza husi Ministeriu do Turizmu Arte no  Cultura (MTAC) sei harame munisipiu lima kompostu husi, Dili, Manatutu, Manufahi, Ainaro no Aileu, ne’ebe hahu iha dia (13-17/09) tinan ne’e. Sekretaria de Estado Arte E Cultura (SEAC), Izabel Ximenes hatete, objetivu husi eventu ne’e hodi hametin paz no dezenvolve ekonomia inklui parte ida hodi promove potensia turismu iha Timor-Leste ba estrangeirus.

Izabel hatutan,  Tour de Timor tinan ida ne’e servisu hamutuk entre MTAC, Gabinete Primeiru Ministru, FCTL inklui parseiro hanesan, Airnorth, National Critical no Trauma Responde Center, Timor Telekom, Air Timor no ConocoPhilips. Iha fatin hanesan Prezidente Komisaun Organizadora, Aquelinho Caerio subliña, rute ne’ebe ciclista sei liu mak hanesan, start iha Palacio do Governu, Laclubar, Betano, Ainaro-Hatubelico, Aileu no finish iha Centru Convensoes Dili (CCD).

Nia esklarese, atleta ne’ebe partisipa ho total 171 kompostu husi ciclista nasional no internasional ho kategoria klase lima mak hanesan, Junior (17-22), Elite (23-29), Master (30-39), veteranus (40-49) no super Veteranus (50+). Entertantu Komandante Polisia Distrital Dili, Alarico Barreto reafirma, konaba siguransa hodi asegura ciclista sira parte Polisia konkorda ona ho ministeriu do turismu para bele asegura. “Sei taka dalan durante oras rua nia laran tuir rute ne’ebe ciclista sira sei liu, no parte saude sei kontinua asegura ciclista nia kondisaun,”dehan nia. Entertantu total orsamentu ba eventu tour de timor ho montante $150,000.00, no premiu ba manan nain sira hamutuk $30,800.00. (BT)