DÍLI----Eskola Basiku Central (EBC) 30 de Agustu husi ekipa feto no mane raut tasu iha eventu Komemorasaun Aniversariu loron Falintil (KAF) ba dala-40, ne’ebe realiza husi Federasaun Nasional Basketbal Timor-Leste (FNBTL) iha edifisiu SEJD. Eventu ne’ebé halao durante loron sanulu resin lima husi dia (10-15/8) no hetan partisipasaun husi EBC hamutuk 27 ekipa kompostu husi feto no mane, ikus mai atleta feto mane husi eskola 30 de Agustu mak sai hanesan kampiaun iha eventu refere.

Eskola ne’ebé partisipa mak hanesan, eskola basiku Central (EBC) Sergio V. Melo, Fatumeta, St. M. Canossa, Rainha da Paz, Farol, Manleuana, Akadiruhun, São Jose Operario, Cristal, Esperansa P. Colegio Paulo VI, São Pedro no 30 de Agustu inklui São Miguel. Entertantu jogu husi ekipa feto  eskola 30 de Agustu manan ekipa São Jose Operario ho skor 31-12, hodi  defini destinu para hetan rejultadu hanesan permeiru lugar, no segundu lugar eskola São Jose Operario, terseiru lugar Fatumeta no kuatru lugar eskola Manleuana.

Husi ekipa mane EBC 30 de Agustu kontinua sai hanesan permeiru lugar wainhira manan ekipa Fatumeta ho skor 46-31 no segundu lugar eskola Fatumeta, terseiru lugar Farol no kuatru lugar eskola Colegio Paulus VI.Entertantu premiu ba manan nain permeiru lugar hetan taxa ida ho osan $350.00, segundu lugar simu taxa ida ho osan $275.00, terseiru lugar simu taxa ida ho osan $200.00 no kuatru lugar simu deit osan $100.00. Eventu ne’e hetan apoiu husi Sekretaria de Estado Joventude no Desportu (SEJD) ho montante orsamentu $. 6,260.00 inklui kompaña Dellos hodi ofrese Dellos ba jogador inklui adeptus sira. (BT)