DILI----Sekretariu Estadu Juventude Desportu (SEJD), Leovigildo da Costa Hornai husu ba komunidade atu kontribui hodi halo aktividade desportu komunitaria  no governu hein hodi kompleta. Leovigildo hatete, atividade desportu komunitaria tinan 2015 iha mudansa tanba SEJD hakarak buka atu hadia. Hadia ne’e laos atu ba fo deit osan ho programa depois hein komunidade implementa, maibe SEJD hakarak desportu komunitaria ne’e tenki inisiativa mai dunik hosi komunidade nian. Ne’e dunik SEJD muda ooituan ninia metódu katak komunidade mak kontribui,  governu hein ba kompleta.

“La bele buat hotu-hotu hein deit hosi governu, depois governu fo tiha osan sira implementa fali buat ne’ebe la refleta ba natureza ka origin ida hosi liafuan desportu komunitaria,” dehan Leo ba Jornalista BT iha k’nua SEJD, segunda (11/05). Leo hatutan, mudansa ne’e laos sentraliza liu ba osan maibe Jestaun supervizaun no metodologia, ne’ebe SEJD hare’e liu ba aprosimasaun hodi hakbesik liu ba iha baze. No osan ne’e sempre fo nafatin ba iha ne’eba liu-liu ba suku ijoladu sira, i SEJD nia ema sei ba para hakbesik ho komunidade  hodi komunidade sira bele implementa atividade tuir termus ne’ebe sira iha. Governu sei la kaer osan tanba osan ne’e transferensia publika nian.

Governu so deside katak osan ne’e la bele uza salah (mal gastu) para ema ida la bele uja ba ninia benefisiu. Ne’e dunik SEJD hakarak halo politika distribuisaun ida ke justu. Governu  la bele fo osan bebeik ba Suku ka Posto Administrativu iha Dili laran, ne’ebe tinan-tinan sira nia proposta sempre hatama ba fatin (instituisaun) 4 ou 5. Ne’eduni governu sei la fo osan ba iha Dili laran.  “konaba implementasaun ba mudansa politika desportu komunitaria hau fo ona orientsaun ba sira hodi hahu implementa ba suku ijoladu iha fulan ne’e.

Ne’ebe funsionariu sira sei para kareta iha munisipiu hodi lao ba suku ijoladu para halo planu hamutuk ho komunidade, depois komunidade sira bele mai foti sira nia osan hodi implementa i osan hira mak atu fo apoiu ba suku refere, funsionariu sei aviza kedan ba komunidade sira katak, total osan mak sekian (X) ne’e para la bele halo konfuzasaun iha komunidade nia let,” tenik Leo. Sobre desportu eskolar, SEJD  buka ona dalan atu halo ajustamentu liu-liu ba jogu sira ne’ebe potensial ne’ebe antes la utiliza i sira hakarak utiliza fali hanesan jogu femenina.

Ne’e dunik nia hanoin, federasaun ida-idak tenki prepara atleta feto hodi kompete iha kualker atividade ka modalidade para iha futuru bele kompete iha eventu internasional. Ne’e dunik buat ne’ebe iha pasadu diak ona SEJD buka nafatin hodi hametin i ne’ebe seidauk kompleta sira buka para hadia hodi kompete iha ne’eba. Leo hatuan, prioridade seluk mak SEJD buka atu konsolida fali hodi tau federasaun hotu iha ambitu ka origin ida hanesan federasaun dunik. Nune’e sira bele ezisti depois bele halo  k’nar ho responsablidade hanesan federasaun dunik inklui prepara kondisaun minimu ba zestaun no politika ida ne’ebe maka bele hadia prestasaun, nomos fo biban no k’bit liu ba iha preparasaun talentu atleta sira nian hodi promove direitu atleta nian.

Nune’e federasaun bele hola papel importante liu. Ne’e dunik SEJD sei halo aprosimasaun ida ho federasaun hotu ne’ebe ezisti iha timor, inklui asosiasaun sira iha munisipiu. “SEJD sei koalia ho federasaun sira para eleva asosiasaun nia prestasaun liu hosi forma ida, katak estruktura sira ne’e hakarak halo servisu dunik no prontu atu kontribui hodi fo energia, matenek, no kontribui ba fahe matenek ne’ebe iha. Tanba prioridade SEJD ba liu iha rai laran para oinsa mak bele prepara politika hodi dezenvolve atividade ka kompetisaun nasional hodi prepara joven sira nia talentu.

Ne’e dunik agora hau fo ona orientasaun ba departementu desportu ho nia ekipa, hodi dezenvolve politika ida ke diak ba desportu eskolar para kompetisaun ruma  bele konvida mos munisipiu sira  para hodi hare’e fini ho talentu diak sira hodi prepara ba futuru. Ne’e dunik prioridade ne’e atu koloka ba atividade nasional para kuandu iha nasional diak ona mak ita foin koalia konaba internasional, tanba se nasional runranga internasional mos hanesan, ne’ebe ida ne’e ita rekonhese no tenki  berani atu hahu hosi rai laran,” hatete Leo. (BT)