Orlando MendesDILI----Relasiona ho eventu Internasional ne’ebe Timor-Leste mak sei sai hanesan uma nain wainhira jogu hasoru Mongolia iha eventu Pra Kualifikasaun Kopa Mundial, Timor-Leste hakarak utiliza Stadion Municipal Dili iha eventu refere, ne’e dunik wainhira FIFA liu husi AFC  halao inspeksaun geral ba Stadion Municipal Dili iha dia (07/03), delegasaun AFC  deside katak Timor-Leste bele utiliza kampo refere tanba Stadion ne’e tuir standar kriteria FIFA nian hodi bele utiliza jogu ne’e iha dia 12 semana ne’e.

Direktur Tekniku Federasaun Futebol Timor-Leste (FFTL) Orlando Mendes hatete, federasaun orgulhu tebes wainhira AFC  deside Timor-Leste bele utiliza Stadion ne’ebe iha , tanba ida foin permeiru-vez Timor-Leste marka storia iha nia nasaun, hodi realiza eventu internasional pra-kualifikasaun kopa mundial. Orlando hatutan, jogu pra-kualifikasaun ne’ebe tuir kalendariu FIFA, Timor-Leste sei jogu kontra Mongolia ho sistema kandang-kandang, ne’ebe iha dia 12/03  Timor-Leste mak sei sai uma nain, no dia 17/03 sei kontinua fali iha Mongolia  no semak liu  sei hakat ba pasu kualifikasaun kopa mundial hodi hadau malu tama ba piala dunia iha tinan 2017.

Nia sublinha, iha eventu internasional pra-kualifikasaun ne’e kompostu husi nasaun sanulu resin rua mak hanesan, India, Yemen, Timor-Leste, Cambodia, Chinese Taipei, Sri Lanka (tim 1), no Nepal, Pakistan, Mongolia, Macau, Brunei, Bhutan (tim 2) i entre nasaun sanulu resin rua ne’e nasaun ne’en (6) ne’ebe pasa sei kompete ho nasaun seluk ne’ebe agora hein hela sira nia prezensia iha kopa mundial hodi hadau malu ba piala dunia 2017. Orlando hatutan, tanba ne’e hanesan uma nain persija halo kompleta ba buat ne’ebe antes  komisaun  organijadora kopa mundial  ejiji liu husi AFC, atu nune’e bele realiza pra-kualifikasaun kopa mundial iha Timor-Leste tuir kriteria FIFA nian.

Orlando reafirma, kriteria ne’ebe Timor-Leste persija halo kompleta mak hanesan, kampo persija ahi/lampu no kualidade du’ut, papan/layar skring, kuartu ho haris fatin ba atleta, loker, siguransa, media room, inklui hotel. “Ho servisu makas entre Federasaun ho sekretaria de estado joventude e desportu (SEJD), konsege prense dunik kriteria tuir standar FIFA nian, atu nune’e ita bele realiza dunik mehi ne’ebe durante ne’e povo timor ejiji, dehan Direktur Tekniku ne’e. Orlando hatutan, konaba jogador sira, halo ona preparasaun durante fulan rua, ne’e dunik laiha problema atu jogu kontra ho se deit!, tanba faktor manan ou lakon ne’e konsikuensia tenki simu. (BT)