COVALIMA----Administrador Postu Administrativu Suai, Luizinho do Rego, hatete iha Postu Administrativu Suai oras ne’e daudaun komesa hahu ona halo verifikasaun ba Uma Naromanba Povu (UNP) ne’ebe tama ona ba faze datoluk.

"Uma Naroman ba Povu ne’e agora ita tama ona ba tinan datoluk ninian ne'ebe implementa iha tinan 2021, 2022 agora tama ba 2023 nian ita komesa halo verifikasaun ba iha lista kandidatu sira ne'ebe maka aprezenta husi komunidade liu husi enkontru asembleia aldeia mai iha Suku sae mai liu iha postu, depois maka administrador postu lidera ekipa PNDS tun ba halo verifikasaun ba lista kandidatu sira ne'ebe aprezenta husi aldeia no suku sira," informa APA Suai Luizinho do Rego ba jornalista iha nia knar fatin, Segunda (08/05).

Nia haktuir, iha postu administrativu Suai kompostu husi suku 5, tanba ne’e hahu verifika husi Suku Debos ninianaldeia tarjetu ne’e iha 4, ne'ebe kada aldeia sei harii uma-3 tan ne'e iha suku Debos sei harii UNP-12, ba fali iha Suku Suai-Loro ninia tarjetu ba aldeia Luma ne’e hotu, Suku Suai-Loro ba tinan 2023 nian sei harii UNP-9, Suku Kamanasa sei harii mos UNP-9 ne’e ba aldeia tarjetu tolu hanesan Aldeia Ailok Laran, Sanfuk no Aldeia Manekin.

"Verifikasaun ne’e ita halo bazeia ba lista kandidatu ne'ebe iha, lista kandidatu sira ne’e mai tanba ita hatene katak kriteria ida atu sai benefisiu ba UNP ne’e iha kriteria-4 laos deit ba kondisaun uma, maibe ita verifika ne’e kondisaun Uma tanba iha ne’eba iita haree fator ida maka kondisaun uma, fator ida seluk mak kondisaun ekonomia, sosial no fator ida seluk maka statutu rai ne'ebe atu hodi harii uma," informa APA Suai.

Luizinho haktuir fator 4 ne’e maka sai determinante, sai fator prinsipal ba kandidatu sira ne’e atu hetan ka la hetan, maibe haree katak maioria lista ne'ebe maka sira aprezenta ne’e maioria tama kriteria. "Maibe ita fiar katak sei fazeadamente tanba aldeia ida sei harii UNP-3 deit, maibe iha aldeia balu uma ida-ida ne’e depende definisaun aldeia tarjetu ne'ebe sira defini iha Konsellu suku" Luizinho hateten.

Nia hatutan depois de verifika sei aprova lista kandidatu sei publika fali iha sede suku ida-idak, depois maka haruka ba Munisípiu no munisipiu haruka PNDS nasional hodi bele halo prosesu aprozionamentu ba uma sira ne'ebe atu harii iha tinan ida ne'e. (BT)